Vawiin chawhnu ah khan Mizoram Journalists Association hruaitu atana thlan thar te chuan Raj Bhavan ah lenglut in Mizoram Governor Lt Gen Nirbhay Sharma (Retd) an kawm.

MJA hruaitu thar te chu lo titi puiin Governor Lt Gen Nirbhay Sharma(Retd) chuan kum 10 pawh a ral hma in Mizoram hmelhmang chu sumdawnna kawngah nasa takin a danglam dawn tih a sawi lawk theih thu a tarlang a. “Hmasawnna kawngpui ah mite rual a kal ve tur erawh chuan tun aia nasa zawk kan inpuah chah tan a hun a, kan khawvel tukverh hawng zauvin kan khawhawi leh rilru puthmang te pawh zauh a ngai”, a ti. Khawhawi zauh ruala mahni hnam thil leh ngaihhlut te kalsan erawh chu thil pawi tak a ni thei a ni a ti a. Chuvangin Mizo mipui te nasa zawka zirtirna pe tur in MJA chuan hna pawimawh tak thawk tur a nei a ti.

Chibing innghirnghona boruak te leh sakhuana kaihhnawih thil a buaina ah te MJA in remna zawngin hna a lo thawk tawh thin tih a hriat thu sawiin Governor chuan Mizoram journalist te chu theihtawp chhuah zel turin a ngen tih a sawi a. National headlines ah Mizoram chanchin tarlan a har tih a hriatpui rualin Mizoram news thenkhat te chu state pawn lam Journalist te thawhpui a sawm in tam zawka tarlan a tul tih a sawi a. Mizoram chanchin leh Mizo culture pawnlam mi ten an lo hriat tam zawk nan MJA chuan hma la se; chumi rual in MJA chuan mipui zirtirna petu leh mipui hnena ngaihdan dik chhawpchhuah sak tu an nihna te bihchiang nawn se a duh thu a sawi a. “Mizoram Journalist ten in thiltih theihna leh in pawimawh na te In hriatthar leh a ngai in ka hria” tiin MJA hruaitu te chu Governor chuan chona thar hmachhawn tur a lo kawhhmuh a ni.

Pu Vanlalrema Vantawl, President, MJA , Office bearer te leh Senior Journalist hova thawkchhuak in MJA hruaitu thar, Raj Bhavan a lenglut te hi an vain 18 an ni a. An inkawmna atanga rawtna lo chhuak te um zuiin Governor Lt Gen Nirbhay Sharma (Retd) hnenah hian an hmachhawp thenkhat te chu hun reilote chhunga thehluh an tum a ni.

Attachment

  • Loading attachment...