Malaria hi inven theih a ni a, Inven theih a nih laiin inthlahdah loh erawh a ngai a, Malaria laka him theih nan Health Department a Malaria lam hotute thu zawm a pawimawh thu Health Minister Pu Lal Thanzara chuan vawiina I & PR Auditorium ah Khawvel Pum Huap Malaria Ni “World Malaria Day” hmanna ah a sawi.
Kum 2016 a World Malaria Day thupui chu “End Malaria for Good” Mizo tawng chuan “Malaria hi bo hlen tawh rawh se” tih thupui hmanga World Malaria Day hman Pu Lalrinliana Fanai IAS, Commissioner & Secretary kaihhruai vawiin programme ah hian, khuallian Pu Lal Thanzara chuan kum 2008 atang khan World Health Assembly in thu tlukna a lo siam tawh angin World Malaria Day hi April 25 a hman thin a lo nih thu leh kumin hi Mizoramah pawh he ni kan hman vawi 9 na a lo nih thu a sawi a. Malaria hi damlo thisen tlemte exam a finfiah (diagnose) theih a ni a. Mizoram Sorkar leh National Health Mission hnuaia National Vector Borne Diseases Control Programme (NVBDCP) hmalakna a zarah mipuiten a thlawna an hman theih turin thisen exam-na leh Malaria damdawi ASHA te hnenah te, Sub Centre ah te leh sorkar damdawiin PHC, CHC leh Hospital ah te dah a nih thu a sawi bawk.
Health Department hi mihring nunna enkawltu pawimawh tak an nih avangin fimkhur a ngaiin inthlahdah a rem loh thu Health Minister chuan sawiin Doctor pakhat zu rimnam emaw Nurse tawngkam nalh lo leh inthlahdah emaw avangin department hmel a chhe thei a ni, a ti a. Chutih rualin thahnem ngai taka thawkin huai tak leh dik taka thawh a tul a, sawiseltu leh tihsual chang ran tu pawh awm theih anih avangin fimkhur taka dikna leh rinawmna, taimakna nen theih tawp chhuah zel turin thawktute chu a chah a ni.
Dr. C. Zarzoliana, Joint Director (Mal) cum State Programme Officer (VBD) chuan Malaria chungchang sawifiahin a lem nen a entir a. Dr. K. Ropari, Principal Director, H&FW Mizoram te, Pu Lalhmangaihzuala, District Programme Officer leh Pi S. Zosangpuii, ASHA Sairang ten thu an sawi bawk.
