1427/2026-2027

17th July, 2026: Vawiin khan Jt Chief Electoral Officer Pi Ethel Rothangpuii hoin Mizoram journalist ten ni khat awh All India Media Conference -2026, India International Institute of Democracy & Election Management (IIIDEM), New Delhi a buatsaihah an tel a. He Conference hi Election Commission of India (ECI) buatsaih a ni.

He Media Conference ah hian India rama State leh UT zawng zawng atangin media mi te leh State Media Nodal Officer te an tel a. Democracy a journalist te mawhphurhna pawimawhzia thlur bingin, inthlan kaihhnawiha mipui hriat tur thu dik zauzawka an puanzar a, thudik lo (disinformation & misinformation) thehdarh do let kawngah chak lehzuala an thawhho theihna turin he inkhawmpui hi buatsaih a ni. Vawiin inkhawmpui thupui hi “Connecting Stakeholders, Strengthening Democracy: The Role of Media in Elections” tih a ni.

Electoral Roll chungchang te, vote thlak dan leh chhiar dan te chiang lehzuala an hriat theih nan te; inthlanna kaihhnawiha India Danpui leh inkaihhruaina chungchang te; election management a mawhphurtute, mi thiam bikte leh Election Commission hotute nena inkungkaihna tha zawk an neih theih nan State leh UT hrang hrang media te hi kohkhawm niin kum tin hetiang hun hi buatsaih thin tum a ni a. ECI hnuaia Director General (Media), Director General (Information Technology) te bakah dan lama mi thiam DDG (law) ten hun an hmang a. An thupui zirho zingah ECINET Platform leh Election a IT pawimawhna te, Election a Media pawimawhna te, Dan kaihhhnawih leh court judgment chungchang te a tel a ni.

Director General (Media) Pu Ashish Goyal chuan Inthlan buatsaihna hrang hrangah Media te nen an thawhho dan tarlangin mipuiten thudik leh rintlak an hriat theih nan thutharthehdarhtu pawimawhna hrang hrang tarlangin thudik tawklo awm thei ah media te leh ECI chu thawkho tur anni tih sawiin India chu khawvela democracy ram lian ber anih angin inthlan buatsaih a hautak a, heng avang hian thawhhona ṭha tak an mamawh tih a sawi a ni.

DG (IT) Dr Seema Khanna pawhin thusawiin tunlai thiamna hmanga inthlan kaihhnawih thuthar hrang hrang awlsam taka mipuiten an hriat theih nana an hmalakna a sawi a, ECINET hmangin state tinah vote thlak dan kimchang tak hriat theih chu hmang tangkai turin media te a chah a ni.

Conference-a tel te hian group hrang hranga inthenin sawrkar thuneituten electoral roll an buatsaih dan entirna (demonstration) te, vote thlak dan chhawng hrang hrang te, vote chhiar dan te a taka enin sawihona hun an hmang bawk a. Tlai lamah Chief Election Commissioner Gyanesh Kumar leh Election Commissioner te -Dr. Sukhbir Singh Sandhu leh Dr. Vivek Joshi te nen kharna inkhawm neih a ni.

He All India Media Conference ah hian Jt Chief Electoral Officer Pi Ethel Rothangpuii leh State Media Nodal Officer Pi Lalnunmawii te bakah HC Vanlalruata, Correspondent, Times of India; K. Zothanpara, News Editor, Vanglaini; Lalramdinsanga, News Editor, LPS Vision; Isaac Zoramsanga, News Editor, AIR News; Caroline Lalrosangi, Reporter, DD News Mizoram; B. Lalmalsawma, Correspondent, India Today NE leh Zorinpuii Hlawndo, Programme Executive, Zonet Cable TV te an tel a ni.