Vawiin khan Mizoram Journalists’ Association (MJA) te chuan General Conference vawi 39-na I&PR Auditorium-ah an hmang a, Parliamentary Secretary to CM Pu Lal Thanzara’n a hmanpui. Conference hawnna inkhawmah hian kum kaltaa MJA member boral Pu Lalthianghlima, Editor-in-Chief, Ramlai Arsi, Serchhip sunna hun an hmang bawk.
Conference hawngtu Pu Lal Thanzara chuan nu in chaw tha tinrenga nau a chawm angin chanchinbute hian thudik leh belhchian tlakin mipuite an chawm tur a ni a; hnam inlak bingna, sakhaw tih bik leh politics tui nu-in media-te a pawlh buai kan phal tur a ni lo, a ti. An mawhphurhna hrang hrang sawiin Pu Lal Thanzara chuan India Danpui hnuaia Mizote nihna dik tak tarlan thiam te, India khua leh tui dik tak kan nihna pholan a, hemi kawnga mipuite zirtirna dik pek hi thil pawimawh hmasa a ni, a ti bawk. Sakhua leh hnam thila innghirnghona chhuah palh chang hian MJA mi leh sa te chu inthiarfihlim thiama thulai la zawk thin turin a fuih. Mizoram chanchinbumite thawhrimzia fakin anmahni avangin nitin zantin thuthar hriat tur a awm a, an lakah mipuite pawhin beiseina sang tak an neih avangin tan la sauh sauh turin a chah bawk. Pu Lal Thanzara hian MJA Library tanpui nan Rs. 30,000/- a hlan a ni.
MJA President Pu H. Zosangliana chuan chanchinbumite chu rawngbawlna leh eizawnna kawp an nih avangin mimal thahnemngaihna avanga kal thui chiam chi kan ni ve lo, a ti. Sakhaw intluktlanna ram kan nih avangin MJA chuan sakhaw voh bik leh thlauh thlak bik neih a thiang lova, hnam leh chi thliar hrang zawnga boruak awm chang pawhin MJA thu leh hla-in mipui zah leh ngaih pawimawh a hlawh thin avangin lawmthu a sawi a ni.
Vawiin Conference-a an thil ngaihtuah te zingah Mizoram Journalist Welfare Fund, Advertisement Rules leh Journalist Pension chungchang te a tel a. MJA Official Resolution pahnih a awm bawk a, chungte chu : “1. Mizoram sorkar I&PR Department ten kum hnih chhungin Press Tour vawi 4 lai min buatsaih sak hi lawmawm kan ti a, Presss Tour-a kan thil zirchhuahte hi journalist te tan leh kan ram tan tangkaina a tam em avangin hun lo kal leh turah pawh chhunzawm zel nise. 2. Press Enclave nei tura hmalakna kal mek hi sorkarin chak takin bawhzui zel rawh se..” tih te an ni.
Mizoram Journalists’ Association hi kum 1971-a din a ni a, kumin hi a kum 40-na (Ruby Jubilee) a ni nghe nghe. Tun dinhmunah General Headquarters bakah District tina member belhkhawmin 231 an awm mek a. Mizoram pumah MJA hnuaia awm chanchinbu leh Cable TV firm neih zat chu : Nitin chanchinbu (daily newspaper) - 94, Hunbi neia chhuak (periodicals) - 15 leh Electronic media - 19 an ni. MJA General Conference vawi 39-na hmang tur hian Mizoram district tin atangin member te an kal tha hle a, an vaiin mi 225 an ni.
