Mizoram Public Service Commission in kumin 2017 a Grade III of Civil Judge of Mizoram Judicial Service (MJS) Examination a buatsaih a tling te zinga Mizoram Law College atanga zirchhuak te lawmpuina hun Mizoram Law College Alumni Association chuan vawiin khan a nei a, Law Minister Pu Lalsawta’n lawmpuina hi hlanin fuihna thu a sawi a ni.
Lawmpuina hunah hian fuihna thusawiin Minister chuan Mizoram Law College in zirlai hlawhtling tak tak a chherchhuak chu lawmawm a tih thu a sawi a. Law graduate te graduate dang aia hna hmuh an awlsam thu sawiin, hei hian subject thiam bik neih a pawimawh zia a tilang a ni a ti a. Dan hriat hi min ti bengvartu leh buaina kan tawh theih tam tak laka min chhan theitu a ni a ti. Minister chuan MJS a inziaktling thar te chu an kal zelna turah duhsakna hlanin, dan chu hriatzawh leh hriatkim a awm theilo a, intuaithar reng tur leh inchhiar zau zel turin a fuih a ni.
Vawiin lawmpuina hun hi Pu Lalsawta pisaah buatsaih a ni a, Dr. JT Vanlalngheta, Chairman Mizoram Law College Alumni Association in a kaihruai a. MJS tling thar Mizoram Law College atang zirchhuak te lawmpui te hi mi 8 niin,;hmeichhia 6 leh mipa 2 an ni. Mizoram Law College hi kum 1983 khan din tan niin, law graduate 450 lai an lo nei tawh a ni.
