Mizoram Junior Taekwondo Championship 2012, nihnih chhung awh Lunglei SAI Extention Centre a neih chu nimin tlai dar 4:00 PM khan khar a ni a, Lunglei HPC Vice Chairman Pu Joseph Lalhimpuia chuan khuallian niin lawmman a sem.

Kharna inkhawm Er. David Lalthanpuia, Adviser LDATA kaihhruaiah hian Pu Joseph Lalhimpuia chuan thu sawiin, Taekwondo Players leh Infiammi te hi Physical tha nei tur a beisei in ni a, kut leh ke hmang a mi tihnat dan zirthiam in nih angin chumi laka inven dan pawh zir in ni. Hei hi Infiamna tualzawlah chauh nilo, nangmahni in chhungkhur leh khawtlangah pawh tangkai zawk a hmang zel turin kan beisei che u a ni a ti. He infiamna hi Zoram pawn a Mizo te pholang thei a ni tih sawiin tumruhna nen bei ula, India leh Asia khawmualpuiah pawh kan lang thei dawn a ni a ti. Mizoram sorkar-in thalaite tan infiamna hmun tur min pe mek a, a hlawkna hi tun Generation ami te hian in chang tur a ni. Nangmah ni ah thiamna, tumruhna a awm chuan Mizo te hian tluk loh tur kan nei bik lo tiin a sawi bawk.

He hunah hian Pu R. Lalnunthara LDSC chuan Taekwondo championship vawi 10-na Lunglei a hlawhtling tak a nghah a ni chu lawmawm a tih thu sawiin kan ram a hausa lo a, mahse sorkar in thalai tan thil tam tak a ti tawh a, hetihlai hian Sorkar in a ti vek thei lova, Association hrang hrang hotu ten mahni sum senga hma an lakna chu lawmawm a tih thu a sawi. Nihnih chhung awh Junior Teakwondo Championship ah hian District 7 atangin infiammi leh official 202 an kalkhawm a, a pumpui ah Aizawl District chu pakhatna an ni.