Nimin khan 67th YMA General Conference ni hnuhnung ber chu Pu P.C Zoram Sangliana, Minister Art & Culture, etc, chuan a hmanpui.

Nimin vantlang inkhawm Pu R. Lalngheta, Treasurer CYMA kaihhruaiah thusawiin Pu P.C Zoram Sangliana chuan kan pianna chu zo hnahthlak eng hnam pawh ni se, mizo nih ah hian duh tawk ila mizo nih ah hian i lungawi ang u a ti a, Mizo ram leh hnam thendarh hi Mizoram sawrkar chuan a phal ngai dawn lova thendarh tum an lo awm palh a nih pawhin mizo ram sawrkar leh mizo mipuite pawi an sawi a ni tih in hria se a duh thu a sawi a, YMA Member tinte kan eizawnna theuhah rinawm leh Pathian tih chunga hmalam pan sauh sauh turin a sawm bawk.

Hlamzuih chungchang sawiin hlamzuih kan neih thin hi tihbo a hun tawh takzet a, kristianna mizorama a rawn luh tanga kum 118 vel a ni tawh a, Kristian nun dan tha ngaisang Pawl YMA pawhin kum 77-na kan hmang mek a, mizo kristiante hian kan thurin bible ah pawh la lang miah lo hlamzuih kan neih hi tih tawp a hun takzet a ni a ti a, hlamzuih ni 90 tling lo a thi hringtu nu leh pa leh chhungte chan hi a rapthlak in an khawngaihthlak em em a, he conference kaltlang hian thisa a piang te tih loh chu tumah hlamzuih a thih tir tawh lo turin mizo kristian tinte ka ngen a, thianchhan thih ngam mizo nula leh tlangval te khawmpuiah hian hlamzuiha tumah thih tir tawh lo turin ka ngen nawn leh che u a ni a ti bawk.

Minister chuan Mizote hi kan hnam a la naupan vang nge dan leh hrai hriatna leh ngaipawimawhna lamah hian kan la hnufual em em a, harsa lo taka dan kan zawm theih ah te kan zawm tha tawk lo a ni a ti bawk.

Pu P.C Zoram Sangliana, Art & Culture Minister hian CYMA Legal Sub Committee 2011-12 leh Law & Judicial Department te lehkhabu buatsaih Bengvarna Vol-I (Dan leh Hrai) tih chu a tlangzarh nghal a ni.

Nizan palai thlahna inkhawm hi Pu J. Lalsailova Finance Secretary,CYMA in inkhawm kaihhruaiin Pu T. Sangkunga President CYMA pawhin thusawiin Tuihna humhalh a tul zia leh ram leh hnam humhalhna kawngah pawh tan kan lak zel a tul thu a sawi bawk.

Nizan vantlang inkhawm vekah hian Dt 22.10.2012 ni a, Pi Lalawmpuii Lungdai khua Vai bawngchaw satin a thah ralna tur thawhlawm thawh niin thawhlawm tlingkhawm Rs 42867/- chu Organising chairman Pu Lalrinmawia Ralte Parliamentary Secretary in Lungdai YMA kutah a hlan nghal a ni. Pi Lalawmpuii ral nan hian Central YMA leh Branch YMA te pawhin ralna an hlan nghal bawk a ni.

67th YMA General Conference Kawrtethawveng-a neih ah hian a tawp thleng a palai inziak lut leh langa kal mi 4039 vel bawr an ni. Palai kal tha ber hi Serhmun Branch an ni.