Vawiin khan Institute of Chartered Financial Analysts of India (ICFAI) University chuan an Sports Week kharna programme Durtlanga an Auditorium-ah an hmang a. Sports Minister Pu Zodintluanga chuan a hmanpui a ni.

Pu Zodintluanga chuan Mizo thalai ten infiamna kawngah theihna (talent) tha tak an nei a, zirnaa hlawhtling tur pawhin finna leh hriatna nei mahse thahnemngaihna leh tumruhna tel lo chuan a tluan tling tak tak thei ngai lovang, a ti. Tunlai thalai te vanneihzia sawiin rual u zawk te neih ve loh thil tam tak thangthar te ban phakah a awm tawh a; school leh college tha te, infiamna hmun tha tak tak te leh Information Technology khawvelin a tuam mek lai hian a chhawr tangkaitu nih ngei tuma, dinchhuah nana hmang turin a chah a. Degree lak ringawt hi thiamna a nilo tih hria a nakina an la chhawr tangkai tur thiamna paw chhuak ngei tura rilru hmang thiam turin Sports and Youth Services Minister Pu Zodintluanga chuan zirlai te a fuih a ni. Khawvel hmasawnna chak tak hian Mizo khawtlang nun pawh nasa takin a her danglam mek a, internet kaltlanga vantlang thuthan (social networking) pawh Mizo thalai ten nasa takin an hmang tawh a. Amaherawhchu thu belhchian dawl lo leh fianfiah loh thehdarh a, thu belh (comment) te pawh siam ve zung zung lo tura fimkhur a tul thu sawiin Minister chuan University zirlai lehkhathiam te chu tan la a, a tha zawnga bul tantu ni turin a sawm a ni.

ICFAI Pro-Vice Chancellor Pu P Rohmingthanga (IAS Retd) pawhin thu sawiin ICFAI University bul tan a nih dan leh zirchhuak te pawhin hna an hmuh zui dan a sawi a. Infiamna ngaina leh tuipui tak Sports Minister kaihhruaina hnuaiah Mizo thalai te leh a bikin ICFAI zirlai te pawhin infiamna huang chhung an luhchilh uar zel a beisei thu a sawi a ni.

Ni 5 chhung awh ICFAI University Sports Week, 2012 chhung hian Outdoor leh Indoor Games chi hrang hrang bakah zai, extempore speech leh debate-ah te inelna neih a ni a. Khuallian Sports Minister Pu Zodintluanga leh Pro-Vice Chancellor ten lawmman an sem.