Nimin tlai khan Mizoram-a basketball inelna huapzau ber - Marova Memorial Basketball Open Tournament, Mizoram Basketball Association (MBBA) leh TBL Enterprise te tangkawp-in an buatsaih chu tan a ni. Tournament hawnna programme hi nizan dar 6:30 khan Zarkawt Recreation Centre-ah neih niin Sports Minister Pu Zodintluanga chu khuallian a ni.

Pu Zodintluanga chuan infiamna chi hrang hrang ah Tournament te hi sawrkar leh mimal thahnemngai ten thalai infiammi ten infiamna lama hmasawnna an nei theih nan leh inthilhlimna atan an buatsaih mai piah lamah Mizo thalai infiammite Mizoram leh India aiawh a khawvel huapa inelna ah an tel theihna atan leh infiamna khawvel ah Mizoram pholang tura inbuatsaihna pawimawh tak mai a nih thu a sawi a. Minister chuan sawrkar hmalakna leh mimal inpekna ah hian infiammi ten tih tur an nei ve a, chu chu mittui tla khawpa tan lak na hi a ni, a ti.

Minsiter hian Pu Marova chu Mizoram a infiamna professionalized lamah bultan tu hmasa a nih thu sawiin a chhungte’n amah hriatreng nana MBBA nen tang ho a Tournament phal taka an buatsaih chuan rah tha chhuah se tiin a duhsakna a hlan a ni.

He hunah Report petu MBBA Assistant Secretary chuan Catch Them Young Policy chu MBBA chuan a taka basketball player te chherchhuah kawnga an tangkaipui thu leh hemi avang hian basketball chuan hma sawnin a danglam tawh a ni, a ti.

MBBA hnuaia hian affiliated club 42 an awm mek a. Tournament ah hian Team 36 telin, chung zingah panga ve ve chu Ist Division leh IInd Division Club te an ni a, a bak zawng chu III Division Club te an ni.

Tournament hi Pu R. Lalrosanga (Marova), Pu R. Sangkhuma fapa kum 2008 a boral ta hriatreng nan TBL Enterprise chuan an buatsaih a ni.