Vawiin khan Mizoram Kailawn - Business Plan Contest & Entrepreneurship Summit 2019 chu Mizoram pum huap entrepreneur te leh entrepreneurship a tui te tan leh he hmalakna kaihhnawiha sawrkar department thawktute leh mithiamte intawhkhawmna hunpui ni turin Vanapa Hall-ah buatsaih a ni. Chawhma lamah Startup Conclave Summit neih niin,Chief Minister Pu Zoramthanga hovin chawhnu lamah Plenary Session neih a ni. Summit ah hian Mizoram Kailawn Business Plan Competition a finalist te hnenah lawmman sem a ni bawk.

Chief Minister Pu Zoramthanga chuan Mizo thalaite zingah entrepreneurship lama tuina nei, hlawhtling tura tih tak meuha bei an awm chu lawmawm a tih thu a sawi a. Zoram in hma a sawn zelna turah chuan entrepreneurship - hna thawh tur zawngtu ni lova a ruaitu zawk nih chu bung thar kan kai theihna tur a nih thu leh chumi avang chuan entrepreneurship chawikan chu sawrkar in a ngaihpawimawh thu a sawi. Chief Minister chuan "kailawn" tih thumal chuan hmasawn belh zel a tinzawng angin, Mizoramin theihna, assets thahnem tak a neih  hmangtangkaia intodelhna leh sum lakluh tipung tura beih chu kan tum tur a ni a ti a. Entrepreneur kalkhawmte chu an hmabakah thahnemngai taka thawk zui zel tur a chah in, Mizoram chu ram hausa leh vannei tak a nihna te hrechhuak tharin, opportunity kan neihte hi ngaihtuahna seng a hma kan lak that a kan thawh that chuan a takin kan ram potential te hi kan phawkchhuak thei dawn a ni, a ti.

Chief Secretary Pu Lalnunmawia Chuaungo chuan hmasawnna atan state sawrkar mai nilo sawrkar laipui pawhin entrepreneurship chu a ngaihpawimawh thu he hunah a sawi bawk a. NITI Aayog chua hmeichhiate zinga entrepreneurship tihhmasawn chua  ngaihpawimawh leh zual thu tarlang in, kumin Mizoram Kailawn intihsiaknaa finalist 40 zinga 16 hmeichhia an ni chu lawmawm a tih thu sawiin, NITI Aayog zirchianna a chhuah hunah pawh Mizoram chuan dinhmun sang tak a chan ngei a rin thu a sawi.

IIMCIP CEO Dr. Subhrangshu Sanyal chuan kum thum chhunga entrepreneurship lama Mizoramin hma a sawn nasat zia sawiin, MEDMOC hmalakna hnuaia sumdawnna bultanna - start up 120 hemi hun chhunga IIMCIP in zirtirna a lo pek tawhte zinga 75% chu tun thlenga sumdawnna la kalpui an nih thu sawiin, heihi business khawvel a an lo hmuh thin nen khaikhin chuan hlawhtlinna lian tak a nih thu a sawi a. Mizoram economy tan pawh a thawhhlawk tur thu sawiin, start up 100 tan sawrkar chuan cheng mtd 2.6 a seng a. Heng start up 100 te hian hna thar 1000 siamchhuakin, cheng mtd khat chuan mi 40 tan hna thar a siam belh zel tihna a nih thu a sawi.

He summit-ah Start Up Conclave ah hian IIMCIP atanga mithiamte hnen atangin zirtirna leh thusawi ngaihthlak niin, business plan intihsiaknaa tel te hnen atangin thusawi ngaihthlak a ni bawk a. Business plan intihsiakna a tel ten stall hawng bawkin, chawhnu Plenary session-ah hian lawmman sem a ni.  Business Plan Competition neih ah hian mi 456 inziak lutin finalists mi 40 thlanchhuah te chu Boot camp neihpui an ni a. Top 20 finalists thlanchhuah leh niin, chung atang chuan lawmman dawng tu mi 5 vawiin hian puan a ni.

Lawmman dawngtute leh an lawmman dawng zat chu a hengte hi a ni: -

Promising Ideas Award - Lalruatfela (Doorbell) leh Lalrinpuii Hmar (Blue Montis) te niin cheng singnga ve ve an dawng.

2nd Runner Up chu Dr. Vanramhlimpuii, Zonu Meat Processing niin cheng nuai 2 a dawng a; 1st Runner Up chu Peter Vanlalhriata, Know Waste niiin cheng nuai thum dawngin; Francis Lalmalsawma Sailo, Zo Mushroom chu pakhatna niin cheng nuai 4 a dawng a ni.

Mizoram Kailawn hi Mizoram sawrkarin Planning and Programme Implementation Department kaltlanga Mizo mipui, a bik takin thalaite zinga Entrepreneurship chawikanna tura buatsaih niin, sawrkar hmalakna MEDMOC (Mizoram Entrepreneurship Development & Monitoring Committee) leh IIM Calcutta: Innovation Park leh tualchhunga an thawhpui Mizoram Consultancy Group (MzGC) te tangkawpa kum 2017 atang khan kumtin buatsaih thin a ni a. Vawiin hian Planning Secretary Dr. C. Vanlalramsanga leh Dr. Subhrangshu Sanyal te chuan he summit in a rahchhuah thenkhat puang in, business competition a tel zinga mi pali chuan state pawn atanga firm lo kalte nen thawhhona thuthlung ziakin, MoU pali a rahchhuah thu te an sawi a. Hemi bakah hian sawrkar in entrepreneur te a chhawmdawlna hnathawh zulzuiin private sector lama mahni business a lo hlawhtling tak tak tawhte atanga entrepreneurship lama mithar leh a tui tak takte kaihhruai a, sum emaw, thiamna emaw market inkawhhmuhna kawngah te an puih theih nan Angel Investor firm din tum anih thu te an sawi bawk.