Rural Development Minister Pu Lalruatkima chuan Mizoram State Rural Livelihoods Mission (MzSRLM/RD Department) hmalakna hnuaia kuhva kau atanga thleng siamna khawl (Arecanut Plate Making Machine) chu vawiin khan Bilkhawthlir BNRGSK Hall kawtah sem chhuakin a phur tu motor te a vailiam.

Vailiam na hun programme buatsaih ah hian Minister chuan thu sawiin Self Help Group (SHG) ten kuhva kau/hnah atanga plate siamna khawl an dawng tur chu a lawmpui thu a tarlang a, sik leh sa, leilung ina a huat loh thleng (eco friendly plate) siam chhuah na chang hria a hma latu Self help group member te chu fakawm a tih thu a tarlang bawk.

Khuallian chuan Pathian ina Ram leilung tha tak min pek chu hmang tangkai a, leilung theihna te haichhuah chu mihringte mawhphurna ani tiin MzSLRM kaltlanga Sawrkar in zokhua kut hnathawk te tana ruahmanna a siam chu dinchhuah pui tum ngei turin kalkhawm Self help group member te a chah a. Mizo te chu a huhoa hmalakna nei leh thawkho nuam ti hnam kan ni tiin chu chu Self Help group kalphung nen pawh a inrem hle a, an hmalakna te alo hlawhtlin theih nan khawtlang hruaitute leh tlawmngai pawl te chu thawhho pui ah a sawm a ni.

Pu Lalruatkima chuan Kuhva in tangkaina a ngah thu tarlangin a kau/hnah chu thleng leh no siam nan bakah kuhva rah kawr chu lehkhapuan siamchhuah nan a hman theih thu a sawi a chu chuan kuhva market thatna a pholang ani tiin market a mamawhna (demand) awmsa chu tharchhuak (supply) turin thawhrimna, teirei peihna leh tum ruhna nena hma la turin kalkhawm mipuite a chah a, Bilkhawthlir khaw mipuite taimakna entawn tlak tak chu chhawm nung zel turin a chah bawk ani.

Pe tu nun neih chu Pathian in mihring te a ruahman dan ani tiin Kuhva atanga sum lakluh te chu mi harsa zawk te tanpui leh Pathian ram zauh nan luangchhuak turin mipuite a sawm bawk ani.
He huna Khual zahawm Serlui A/C Bialtu MLA Pu Lalrinsanga Ralte chuan SHG ten khawl an dawng tur chu thil lawmawm tak ani tih tarlangin tun dinhmun aia hmasawna an awm ngei theihnan member te chuan SHG a an awm chhan chu mahni inzawt nawn fo turin a chah a. Taimakna, tum ruhna leh mahni inthunun theihna chu hlawhtlinna bul ani tiin tih tak zeta an thawh chuan hlawhtlinna rah an seng ngei dawn a, khawl thar chu SHG Member te tan malsawmna ni ngei turin duhsakna a hlan ani.

MzSRLM hi kum 2013 a bul tan niin tun dinhmunah Mizorama District paruk (Aizawl leh Lunglei tel loin) ah kalpui mek ani a, kum 2018 khan Bilkhawthlir RD Block hnuaia VAU SHG chuan India Ram puma SHG titha lawmman an dawng a ni. Arecanut Plate Making Machine hi Bilkhawthlir leh Zawlnuam RD Block hnuaia SHG te hnenah pahnih ve ve semchhuah a ni.

He hun hi Pu Lalhmingthanga, Commissioner & Secretary, Rural Development Department in a kaihruai a, Pi H.Lalchhandami, CEO, MzSRLM in report pe in Village organization, Bilkhawthlir South atangin an hmalakna te ngaihtlak ani a, Pu Benjamin Lalzama, Project Director, DRDA Kolasib in lawmthu sawiin hun a khar a ni.