New Economic Development Policy (NEDP) hnuaia Entrepreneurship Development Scheme (EDS) thiltum te tihlawhtling tura hmalakna pakhat, “Mizoram Kailawn” chungchang inhrilhriatna leh entrepreneurship lama tui zirlaite hipna turin Mizoram State Entrepreneurship Development Monitoring Committee (MEDMOC) leh IIM-Calcutta Innovation Park tangkawp chuan vawiin khan Lal Thanhawla Auditorium-ah Outreach Programme a buatsaih. He hunah hian Govt. Zirtiri Science College, Aizawl North College leh ICFAI zirlai te an tel a ni.
He Outreach Programme hi Pu Lalrinnunga Jahau, EDS Project Coordinator chuan kaihruaiin, IIM-Calcutta Innovation Park atangin Prof. Chandradeep Mitra, Project Director leh Pu Gaurav Kapoor, Project Manager ten thu an sawi a. Dr. Lalchhuanmawia, EDS Master Trainer chuan zirlaite hnenah entrepreneurship chungchang sawifiahna nei in, tun dinhmunah Mizoramah hna zawng an tam thu leh, pawl 12 pass tawh Employment Exchange-a inziaklut ringawt pawh thalai sing thum dawn an awm thu leh, kum khat a Sorkarin hnaruak hnawhkhat turin mi za pawh a lak theih loh chang a awm thu tarlangin, heng zawng zawng hian sorkar hna ringawt nilo eizawnna kawng dang melh a tulzia a tilang a ni, a ti a. Chumi avang chuan entrepreneurship lama hmasawnna leh kawng awm thei dap chu Mizoram hmasawnna tur kawng a ni tih a chiang a, hei hi Sorkar pawhin ngai pawimawhin, NEDP hnuaiah Entrepreneurship Development Scheme (EDS) hi a telh thu a sawi a. Hemi atan hian Sorkar lam thiltih ringawt ni lovin mimal thahnemngaihna leh remhriatna ah a innghat a ni, a ti.
Vawiin ah hian entrepreneur ni lai mek leh ni duh te tan inelna, Business-Plan Contest chungchang inhrilhhriatna neih a ni a. Zawhna leh chhanna hun neih a ni bawk.
