Vawiin chawhma khan Convention Centre, Lungleiah Mizoram sawrkar flagship programme thar New Economic Development Policy (NEDP) hnuaia Entrepreneurship Summit leh Business Plan Contest (MIZORAM KAILAWN) neih tur chungchang inzirtirna hun NEDP Outreach Programme hman a ni.

He hun hi Lunglei SDO (S) Pu H. Lalrinpuia, MCS-in kaihruaiin Mizoramah hmasawnna chak zawka a kal theihna atana policy duan thar NEDP chungchang zirho tura Lunglei khawpui chhunga zirlai thahnem tak an kalkhawm thei chu lawmawm a tih thu a sawi a. Tunlai khawvel changkang chho zelah zirlaibu atanga thiamna chauh a tawk tawhlo tiin Pu H. Lalrinpuia chuan khawvel hmun hrang hranga thil thleng leh sawrkar hmalakna te ngaihven thin turin zirlai kalkhawmte a chah a. Mizo thalaiten thiamna leh talent tha tak an nei a, heng te hi hmang tangkai leh dinchhuah pui tur chuan taimakna a pawimawh hmasa ber a ni tiin zirlaite a fuih bawk.

Dr. Samuel L Thanga, Entrepreneurship Development Scheme (EDS) Master Trainer chuan Powerpoint Presentation hmangin zirlai kalkhawmte zirtirna pe in, Entrepreneurship chungchang a hrilhfiah a. NEDP chu huapzau leh tih bik nei rana ram thanna tura hmalakna a ni tiin hetiang hmasawnna thleng tur chuan mahni kut ke ngeia eizawnna kawng dap thiam entrepreneurs-te Mizoramin a mawmawh chho zel dawn a ni, a ti. Hetiang rilru themthiamna hmanga eizawnna dap chhuak thei, sumdawnna thar tan tura ruahmanna siam thiam te tanpui na atan Mizoram sawrkar chuan NEDP hnuaia EDS-ah Start Up Mizoram – B Plan Contest 2017 huaihawt a nih tur thu a sawi a. Entrepreneur hlawhtling nih chu mi dang tam takte tana malsawmna thlentu, mite eizawnna siamsakna kawng a ni, a ti bawk.

Hemi hnu ah hian Pi Lalrinngheti, Indian Institute of Management, Calcutta Innovation Park IIMC (IP) chuan Business Plan Contest 2017 (Mizoram Kailawn) leh Entrepreneurship Summit (E-Summit) October-a neih tur sawifiahna hun a hmang a. He contest-a tel duh te chuan www.mizoramkailawn.org emaw www.mizoramkailawn.com ah in register theih niin 21st July 2017 – 31st August 2017 hun chhungin application hi thehluh theih a ni a. He contest-ah hian thalai mahni kutkawiha eizawnna kawng zawh duh te tan tel theih vek a ni tiin zirlai kalkhawmte chu tel ve theuh tur in a sawm a.  25th September-ah finalist 40 te hming tarlan tura ruahmanna siam niin heng finalist te hian 4th-10th October chhungin training an nei hnu ah 10th October, 2017-a Entrepreneurship Summit ah Final Round leh Result puanna hun neih a ni ang.  Finalist-te training hi India ram chhunga Management zirna tha berte zinga mi Indian Institute of Management, Calcutta (IIMC) mithiamten an zirtir dawn a ni. 

He hun vek ah hian EDS Brand Ambassadors atan Lunglei Government College (LGC) zirlai pahnih C. Lalremtluanga leh Malsawmkimi Sailo te ruat an ni. 

Vawiin programme-ah hian HATIM, Lunglei Government College, J Buana College, Government Higher Seceondary School leh Mizoram Polytechnic zirlai thahnem tak an kalkhawm a. Mithiamten zirtirna an pek zawh ah zirlai kalkhawmte chuan an thil hriat duh hrang hrang te zawtin hun an hmang zui a ni.