No.7554/2020-2021

UD&PA Department buatsaih ‘Cleanliness Competition in Urban Mizoram - 2020’- a Lunglei khua in lawmman pahnih a dawn ‘Overall Cleanest Town’ leh ‘1^st Rank for District Headquarter’ te pualin Lunglei khawpuiah ni hnih chhung (18^th & 19^th February 2021) lawmna leh faina kawnga inzirtirna leh hmalakna neih a ni.

Vawiin a lawmna ni khatnaah hian Lunglei khaw pum huap faina hnatlang ‘Leitlangpui Faina Hnatlangpui’ neih niin Lunglei Sanitation Task Force Chairman Pu R.Vanrengpuia chuan DC Office tualzawlah LEITLANGPUI FAINA HNATHLANGPUI hi a kick-off a ni. Hawnna program Pu Andrew Lalhruaia, DUDO Lunglei kaihhruaiah Pu R.Vanrengpuia chuan Lunglei khawpuiin Mizorama fai ber nihna a lak chu fai leh zuala chhunzawm tura hnatlangpui koh a ni chu hmasawnna a nih thu sawiin mahni hmunah theuh fai chhunzawm zel turin Lunglei mipuite a chah a ni.

‘Leitlangpui Faina Hnatlangpui’ Kick-Off program ah hian kalkhawmten he thutiam hi an sawi rual a ni:

“LUNGLEI KHAWPUI HI MIZORAM KHAWPUI FAI BER KAN NI TA HI KA LAWM HLE A. A TI FAI TU NI CHHUNZAWM ZEL TURIN THEIHTAWP KA CHHUAH DAWN A NI TIH KA TIAM E.”

‘Leitlangpui Faina Hnatlangpui’ ah hian Lunglei town area VC 24-ten anmahni veng theuhah chhung tin atanga mi pakhat tal thawk chhuak tura faina hnatlang kovin mipui thahnem tak thawk chhuak ten kawngpui dung, kawng sir, side drain, retaining wall then fai hna an thawk mup mup a ni. UD&PA Department chhut danin ‘Leitlangpui Faina Hnatlangpui’ ah hian mi 6000 atanga 8000 inkar hnatlang turin an beisei a ni.

Khawpui Fai Ber Lawmna hi naktukah chhunzawm tur niin naktuk 19/02/2021 chawhnu dar 1:30-ah  Agriculture Minister Pu C.Lalrinsanga hovin Convention Centre-ah lawmna program neih a ni ang.