Mizoram sorkarin Mizoram Land Revenue Bill 2011 Draft zirchiang tura ruat Study Team te chu vawiin khan Land Revenue & Settlement Minister Pu J.H.Rothuama hovin Land Revenue Department Conference Hall-ah an thukhawm.

He meeting-ah hian Draft Bill chu uluk taka an zirchian hnuah Team member te chuan an ngaihdan theuh leh rawtna hrang hrang te an sawiho a. Mizoram Land Revenue Bill-ah hian ram inchhuhsak chungchang te, chhiah pek lova hrem dan tur te, ram inhman hawhtir dan tur te, state chhunga ram zawng zawng ‘zone’ ah fel taka then dan tur te pawh telh theih tura beisei a ni a. Draft Bill bakah hian Mizoram Urban & Regional Development Act, 1990, The Mizoram (Prevention of Govt. Land Encroachment) Act 2001 chungchangte pawh sawiho a ni bawk.

Mizoram Land Revenue Bill, 2011 Draft zirchiang tura Study Team member te chu L&RS Minister Pu J.H.Rothuama bakah Pu John Siamkunga, MLA, L&RS Secretary Pu R.L.Rinawma, Law & Judicial Principal Secretary Pu P.Chakraborty, L&RS Director  Pu R.Lalhmangaiha, Pu S.L.Sailova, IAS (Rtd), Pu Denghnuna, IAS (Rtd) leh Pu H.Raltawna, IAS (Rtd) te an ni.