89/2025-2026

Aizawl, the 8th April, 2025: Vawiin khan Govt. T. Romana College (GTRC) leh 1 Mizo Bn. NCC tangkawpte chuan GTRC Auditorium, Aizawlah Govt. T. Romana College NCC te hlawhtlinna lawmna leh NCC cadet-te chawimawina hun an buatsaih a. He hun hi Mizoram Larsap, General (Dr) Vijay Kumar Singh, PVSM, AVSM, YSM (Retd) chuan khuallian niin a hmanpui a ni.

Khuallian Larsap General (Dr) Vijay Kumar Singh (Retd) chuan Govt. T. Romana College NCC te hlawhtlinna chu chhuanawm a tih thu leh an lo dawnsawn dan chuan a hneh takzet thu sawiin, "Hei hian zirna tha tak a ni tih a lantira, mimal thawhrah chauh a ni lova, college-a thawk zawng zawngte leh zirlaite inkara thawhhona tha neih vang a ni," a ti a. Tunhnaiah NCC cadet te'n armed forces-a luha officer nih theihna hun tha tak an nei tih sawiin, NCC cadet-te chu hemi tinzawna theihtawp chhuah turin a fuih a. Mizoram zirna tihhmasawn kawngah Govt. T. Romana College-in thahnemngai taka tha a lo thawh tawh thin thu sawiin, zirna baka NCC nung tha taka an kalpui thei chu lawmawm a tih thu a sawi bawk. 

Larsap chuan kumin Republic Day Parade, New Delhi-a neihah Mizoram atanga telte  India ram mipui mit fukna ber leh fak hlawh berte zinga mi an ni chu chhuanawm a tih thu sawiin, amah ngei pawhin fakna a dawn nasat thu a sawi a. NCC chu hamthatna hrang hrang leh hna hmuhna tura pawimawh a nih mai piah lamah, mihring chhawrtlak leh tha zawk ni tura quality leh value siamtu, khawtlang mamawh mihring tha zawk chherchhuaktu a ni, a ti a. Mizoram NCC hmalakna chhuanawm a tih thu sawiin, hemi kawnga 1 Mizo Bn. NCC Commanding Officer Col SS Kalia leh a thawhpuite inpekna fakawm a tih thu a sawi a. Junior Under Officer (JUO) Jacksy Lalhlimsangi hlawhtlinna chhuanawm tiin, cadet dangte hlawhtlinna pawh thinlung taka a lawmpui thu a sawi bawk. 

March ni 25, 2025 a Guwahati-a North East Region (NER) huamchhunga NCC titha 'Best Educational Institutes for NCC NER 2024-2025' lawmman semna neihah khan Govt. T. Romana College (1 Mizo Bn. NCC) chu Mizoram College zinga NCC kalpui tha ber 'Best NCC College in Mizoram 2025' atan thlan a ni a. Nikum khan he chawimawina hi lo dawng tawhin a kum zawna an dawnna a ni. Hemi bakah hian an College zirlai Junior Under Officer (JUO) Jacksy Lalhlimsangi chu  Best Cadet NCC NER 2024-25 hnuaiah Silchar Region, Girls (Army wing & others) category-ah cadet tha bera thlan a ni.

Larsap hi College a thlenin NCC te'n guard of honour an pe a. Govt. T. Romana College Principal Dr. Jenifer Lalbiakdiki'n inlawmna thu sawiin report a pe a. Col SS Kalia, Commanding Officer, 1 Mizo Bn. NCC hnen atangin thusawi ngaihthlak a ni a. He hunah hian Larsap chuan Govt. T. Romana College NCC Cadet leh CTO te chawimawina a hlan a ni. 

Govt. T. Romana College NCC (1 Bn. Mizo NCC) hi August ni 4, 2003 ah din a ni a. Cadet 1860 bawr vel zir chhuak tawhin tunah hian cadet 80 an nei mek a ni.