88/2025-2026

Khawzawl, dated 8th April 2025 : Vawiin chawhnu dar 2 khan DC Meeting Hall-ah Union Minister of State i/c Ministry of MSME (Micro, Small & Medium Enterprises), Pi Shobha Karandlaje-in Khawzawl tlawh a tum (tentative programme) chungchangah sawihona neih a ni a, Khawzawl DC Pu K. Vanlalthiana'n hun a kaihruai a ni.

Chairman Pu K. Vanlalthiana chuan central sawrkar atanga tlawhtu kan nei tur hi lawmawm a tih thu a sawi a, Minister zahawm takin Khawzawl district a lo tlawh hunah a mipui te, sawrkar hnathawk te leh a hmun te thlenga hriat reng tlak a lo nih theih nan dawngsawng tura inbuatsaih a tul thu a sawi. Office hotute chuan sawihona tha tak an nei a, Mizo hnam mawina leh thatna tihlan theih dan tur hrang hrang sawi hovin Minister programme neih tur te lo hmanpui dan tur an sawi ho a ni. MSME lama hmalakna Khawzawl district a lo awm tawh te pho lan theih dan tur an sawi ho bawk a ni. Chairman Pu K. Vanlalthiana chuan office hotute tha takin an lo tel theih avangin lawmthu a sawi a, hlawhtling taka Minister programme hman a nih ngei theih nan tang rual turin a sawm bawk a ni.

He hunah hian Khawzawl district-a sawrkar office hotute kim takin an tel a, Khawzawl Joint VC President Pu C. Pazawna a tel bawk a ni.

Union Minister of State Pi Shobha Karandlaje chuan April ni 17, 2025 hian Khawzawl tlawh a tum a, PMEGP beneficiary kawm te, Govt. College, Khawzawl tlawh te leh Chawngtlai leh Tualte khua tlawh te a programme-ah hian a tel a ni.