4530/2024-2025

Aizawl, the 4th March, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Geospatial World buatsaih 'Indo Pacific GeoIntelligence Forum 2025', a tum 15-na chu Hotel Vivanta, Dwarka, New Delhi-ah a hawng.

Mizoram Larsap General (Dr) Vijay Kumar Singh chuan Indo Pacific region chu khawvela sum leh pai than chakna hmun mai bakah ram venhimna kawnga hmun pawimawh tak a nih thu sawiin, Geospatial technology leh GeoIntelligence-te chu hemi ram huamchhunga awmte tana hmanraw tangkai tak a nih thu leh geospatial data-te ruk chhuah a nih loh nana venhim a tul thu a sawi bawk. 

Larsap chuan Indo Pacific region chu khawvel pum ang pawha insumdawntawnna hmun pawimawh tak, khawvel mipui zatve aia tam mah chenna leh ram leilung hausa tak a nih thu sawiin, boruak munawm leh ralmuang a awm zel theih nan thiamna sang zawk next-generation GeoIntelligence hmanraw hrang hrang AI, Machine Learning, Spacial computing leh adangte chhawr tangkai a tul thu thu a sawi a. Indo Pacific region-a awmte chu tun hun leh nakin zel thlenga boruak muanawm a awm theih nana ngaihtuahna senga helam hawia hma la tur leh thawkho turin a sawm a ni. 

A hawnna hunah hian Lt Gen AKS Chandele, PVSM, AVSM (Retd), President -Defence, Internal Security & Public Safety, Geospatial World chuan inlawmna thu a sawi a. Lt Gen Vinod G Khandare, PVSM, AVSM, SM, Principal Advisor, Ministry of Defence, Pu Adam Reedy, International Government Sales Manager, Esri leh Vice Admiral Tarun Sobti, AVSM, VSM, Deputy Chief of Naval Staff, Indian Navy te'n thu an sawi bawk a. Pu Sanjay Kumar, Founder & CEO, Geospatial World-in lawmthu sawiin hun hman a khar a. Governor hian hemi puala Exhibition buatsaih a hawng nghal a ni.

Indo Pacific GeoIntelligence Forum hi defence lam kaihhnawih thiamna chi hrang hrang zir tura intawhkhawmna niin, chenna hmun azirte, sik leh sa inthlak avangte emawa buaina awm thei leh changkanna avanga danglamna thlengte zirho thin a ni. Kumin thupui atan 'NextGen Sovereign GeoIntelligence Assets for Regional Security' tih hman niin, naktuk thleng a awh dawn a. Hemi hun chhung hian sawm bik mithiamte'n defence technology kaihhnawih hrang hrangah zirtirna an pe dawn a ni.