4801/2024-2025

Aizawl, the 25th March, 2025: Mizoram Larsap General (Dr) Vijay Kumar Singh, PVSM, AVSM, YSM (Retd), Chief Rector of Mizoram University chuan Mizoram University (MZU) Convocation vawi 19-na, Multipurpose Hall, MZU Campus, Tanhrila neih chu vawiin khan Khuallian niin a hmanpui. He hunah hian Mizoram Chief Minister Pu Lalduhoma chu Khualzahawm a ni.

Khuallian Larsap General (Dr) Vijay Kumar Singh (Retd) chuan MZU Convocation vawi 19-na kaltlanga degree, gold medal leh lawmman dawngtu zawng zawngte duhsakna hlanin, he hunah hian zirna a hlawhtlinna mai nilo tanrualna a taka lantirna lawm tura kalkhawm kan ni a, tuna hlawhtlinna kan chante hi hmalam hun atana min kaihruaitu leh chakna min petu nise a duhawm hle ang, a ti a. Kum 2001-a Central University a nih hnuah MZU chu Mizoram zirna mai piah lamah hmasawnna thlentu a nih thu sawiin, tunhnaia MZU dinhmun tarlanna hrang hrang - NIRF in India ram University tha 77-naa a thlangte, Times Higher Education Impact Rankings 2024 in North East University zinga 1-naa a thlangte, Indian Institution Ranking Framework (IIRF) 2024 in India rama Central University tha zual a thlan chhuah 20 zinga 15-na dinhmun MZU in a hauh pha leh Faculty 5 leh Research Scholar 1 te Stanford University zirchianna September 2024 a tih chhuahin khawvela scientist tha zual thlan chhuah za zela 2 zinga a dahte chu chhuanawm a tih thu a sawi bawk.

Larsap chuan Mizoram University chu hmanraw tha ber bera thuam, India hmarchhaka University tha leh hmahruai ni zel tura theihna nei a ni, a ti a. Kum 2013 atanga Choise Based Credit System kalpuite, green energy hman kawnga hmalaknate, E-journal tangkai taka hman anite, zirna puitu tunlai thiamna khawl changkang leh tha tak tak bun a ni leh institute/corporation-te nen thawhdunna thuthlung an ziak nualte chu lawmawm a tih thu a sawi a. Zirna kaihhnawih thil dang, vantlang rawngbawl hna an thawk thin chu ropui tiin, "Zirna hi academic chauh ni lo, kawng engkima mimal hmasawnna, zirlaite nunkawng dika kaihruaitu tur a ni," a ti a. Tunhnaiah Mizoram Assembly-in State pual University dinna tur 'Mizoram State University Bill 2025' lungrual taka a pawm chu lawmawm a tih sawiin, Mizoram University chu kum 2035 ah chuan ngawrh zawka research kalpuina tur University a nih theih dawn thu a sawi bawk.

Khualzahawm Chief Minister Pu Lalduhoma chuan degree dawng tharte a lawmpui thu sawiin, hun reilote chhunga North East India-a University changtlung berte zing ami a ni thei chu chhuanawm a tih thu sawiin, Mizorama zirna sang ber a nih angin zirlai leh researcher-te tan hmasawnna tur thil thar a chhawpchhuah sak zel a beisei thu a sawi a. Tunhnaia MZU hlawhtlinna hrang hrangte tarlangin, NAAC in 2019-2024 chhung atana Grade 'A' a pe leh Mizoram State Pollution Board Green Audit Report-a 'A' Grade pek an nite chu chhuanawm a tih thu a sawi a. March 2025 thlenga Research Scholar 1277 an neite, Laboratory leh class room tunlai ber ber an neihte bakah MOOC leh SWAYAM hnuaia India hmar chhak state zinga online class kalpui hmasa ber an nite chu fakawm a tih thu a sawi a. Architecture & Planning Complex siam thar a ni chu lawmawm tiin, LLM leh integrated LLB course hawng turin UGC leh Ministry of Education-ah rawtna thlen a ni a, financial approval ngaihchan mek a nih thu a sawi bawk.

Chief Minister chuan Mizoram chu kum kha leh chen inthliarna awm lohna a nih thu sawiin, University leh a hnuaia college hrang hrang thuneitu leh zirlaite chu midang tihduhdah leh diriamna 'ragging' awm lo tura hma la zel turin a chah a. Zirna hmunah inremna leh zahawmna vawnhim tlat a tul a ni, a ti a. Zirlai hlawhtling tak tak chherchhuaktu zirtirtute fakawm a tih thu sawiin, zirlaite chu an kalzelna turah duhsakna hlanin khawtlang leh ram tana mi tangkai nih tun turin a fuih bawk.

MZU Convocation-ah hian MZU hnuaia zirlai 7724 te hnenah degree hlan a ni a. Vawiina inlan Doctor of Philosophy 104, Master's Degree 567, Master's Professional 149, Bachelor's Degree 143, Bachelor's Professional 176, Gold Medalist 51 leh Book Prize winner 3 te kutah degree leh lawmman hlan a ni.

He hunah hian MZU Registrar Prof. Lalnundanga'n Vice Chancellor phalna laa convocation tan theih thu a puanfel hnuah Mizoram University Vice-Chancellor Prof. Dibakar Chandra Deka chuan kalkhawmte lawmna thu a sawi a. Degree, Gold Medal leh book prize winner lawmman hlanna hun hman a ni a. Registrar-in lawmthu sawiin Convocation a khar a ni.

Mizoram University Convocation vawi 19-naah hian Faculty leh Staff-te bakah zirlai chhungte an tel a ni.

Mizoram University hi kum 2001 khan din niin, tun dinhmunah Department 37 a awm a. Centre 2 te'n School of Study 10 ah UG, PG leh Ph.D programme an kalpui mek a. Affiliated College 40 leh Constituent College 1 a nei mek bawk.