4802/2024-2025

Aizawl, the 25th March 2025:  Vawiin khan Rural Development Department chuan Thingsulthliah RD Block in kum 50 a tlin lawmna hun Thingsulthliah RD Block Office -ah a buatsaih a. He hun hi Rural Development Minister Prof Lalnilawma chuan Khuallian niin a hmanpui.

RD Minister chuan Thingsulthliah RD Block-in kum 50 hmel a hmu chu ropui a tih thu a sawi a. Rural Development Department chu thingtlang mite tihhmasawnna leh chawikanna atana hnathawk sawrkar department  a ni a. Chuvangin, Rural Development Department-a thawkte chu an hawihhawm tur a ni a, mipui tan dawr an nuam bawk tur a ni a ti.

He hunah hian RD Minister chuan Thingtlang mite tan RD in hna tha taka a thawh chhunzawm zel theih nan mipui thlawpna leh thawhpuina pawh a pawimawh tih a sawi a. RD hnuaia hmalakna te a lo puitlina, RD hnuaia hnathawh te a that leh zualna turin a thawktute fuihin mipuite phungbawmna a sawm nghal bawk a ni.

Thingsulthliah RD Block Golden Jubilee lawmna inkhawm hi Pu Reuben Lalhmangaihzuala, APO in a kaihruai a. He hunah hian Pi Malsawmhriatzuali, BDO Thingsulthliah-in lawmna leh inhmelhriattirna hun, leh RD Dept. in Thingsulthliah RD Block huam chhunga an hmalakna report a pe a ni.

Thingsulthliah RD Block  Golden Jubilee lawmnaah hian he Office-a BDO lo ni tawh te leh he office-a lo thawk tawh zawng zawng te sawm an nih mai bakah, Thingsulthliah RD Block huam chhunga VC leh NGO te pawh sawm an ni.

Thingsulthliah RD Block hi 04.01.1974 khan hawn a ni a. A tirah Community Development Block tih a ni a, kum 1984 khan RD Block tia thlak a ni. He RD Block ah hian  BDO hmasa ber chu Pu Rualkhama, AEO niin tun thlenga Thingsulthliah BDO awm tawh zat chu mi 33 an ni.

RD Minister Prof. Lalnilawma hi Pu V.Lalengmawia Additional Secretary, RD, Pu.K.Lalrohlua, Director, RD, Pu Lalnundika, Project Director, DRDO Aizawl leh RD  Official ten an ṭawiawm a ni.