4803/2024-2025

Lunglei, 2025 Vau thla ni 25: Vawiin khan Lunglei District Bawrhsap & Competent Authority for Land Acquisition (CALA) Pi Navneet Mann chuan National Highway-54 kawngpui laih zauh leh siam ṭhat hna thawh meka Zobawk North leh Zobawk South huam chhunga hma lakna hrang hrang chu a hmunah kal chilhin a enfiah a. Additional Deputy Commissioner Pi Rochuangkimi Khenglawt, Settlement Officer Pu Beitlotha Nohro leh DIPRO Pu C. Lalhruaitluanga te'n an ṭawiawm.

Bawrhsap hi NH-54 kawng siam mek enkawltu NHIDCL (National Highways & Infrastructure Development Corporation Limited) te, hna thawktu (contractor) ABCI Infrastructure Private Limited te leh Zobawk North leh Zobawk South khawtlang hruaitu (local council) te'n an lo dawngsawng a. Hna kal meka hmasawnna awm dan leh khawtlang mipuiin harsatna an tawh leh hna thawktute'n harsatna an tawh te en hovin, hma lak zel dan tur leh harsatna hrang hrang chin fel dan tur te an sawi ho a ni.

Vawiina kawng siam hna thawh mek ennaah hian kawng atana ram lak, ROW (right of way) chin leh road reserve chin huam chhung neka in sak nia lang ṭhenkhatte enfiah niin, hma lak zui dan tur ruahman a ni a. In la ṭhiah loh ṭhenkhat awmin kawng laih hna kal lai a tihkhaihlak dan te en ho niin, in neitute harsatna chin fel a nih theihna tur leh kawng laih hna pawh chhunzawm thuai a nih theihna tura hma lak dan tur sawi ho a ni bawk a. Zobawk North leh Zobawk South khaw chhunga kawngpui zauh avanga vantlang inkal pawhna kawng leh step chhia siam ṭhat theih dan tur te, hmun ṭhenkhata tuiluankawr (side drain) leh kawng dawlna (retaining wall) siamna tur te, kawng khu avanga mipuiin harsatna an tawh ṭhin te leh kawng siam hna chak zawka kalpui a nih theih dan tur te en ho niin, harsatna hrang hrang chin fel dan tur leh hma lak dan tur te sawi ho a ni.

Attachment

  • Loading attachment...