402/2025-2026

Aizawl, the 30th April, 2025: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan Spastic Society of Mizoram buatsaih, 'World Autism Acceptance Month' kharna hun, Gilead Special School, Bawngkawn Brigade venga neih chu Khuallian niin a hmanpui.

Khuallian Mizoram Larsap, General (Dr) Vijay Kumar Singh (Retd) chuan Spastic Society of Mizoram din a nih chhoh dan leh an chanchin bakah khawtlang tana an rawngbawlnate chu ropui a tih thu a sawi a. Pathianin vohbik ni tura a siamte'n thiamna leh theihna danglam bik an nei theuh tih sawiin, vawiina hmuh theiha an rawn pholang hi a nemnghehna a ni, a ti a. Spastic Society of Mizoram hotute, Gilead Special School-a thawktute leh anmahni tawiawmtu nu leh pate inpekna leh dawhtheihna chu ngaihsanawm a tih thu sawiin, vohbik nu leh pate chu Pathianin mi danglam bikte enkawl tura a bik taka a thlan chhuahte an nih thu a sawi bawk. 

Mizoram Larsap chuan vohbik naupangte tan Sawrkarin theihtawp a chhuah thu sawiin, Prime Minister pawhin rualbanlo tih thin chu ti bovin Pathian fate 'Divyangjan' ti a a vuah thu a sawi a. Spastic Society of Mizoram chu tun aia huang zauha, zokhaw lam dapchhuaka outreach programme tam zawk neih tum tura chahin, puih an ngaihna zawnah a theih ang anga puih a inhuam reng thu a sawi a. Sociey nung leh tha tak, tun aia lian leh chak zawk din tura theihtawp chhuah zel turin a sawm a ni. 

He hun hi Pi Chhingpuii, Chairperson, Spastic Society of Mizoram chuan kaihruaiin inlawmna thu a sawi a. Prof. Margaret Ch. Zama, Founder Member hnen atangin Spastic Society of Mizoram chanchin leh report ngaihthlak a ni a. Pi Zokhumi Vankung, Vice Chairperson, Spastic Society of Mizoramin lawmthu sawiin hun hman a khar a ni.

Programme hman zawh hnu hian Larsap hian Gilead Special School classroom leh hmunhma hrang hrangte tlawhin thawktute a kawm a ni. 

Spastic Society of Mizoram hi kum 1989 April thla khan Society for Rehabilitation of Spastic Children ti a din niin, kum 2005 khan tuna a hming put tak Spastic Society of Mizoram ti a thlak a ni a. Gilead Special School for Multihandicapped Children, tuna Gilead Special School ni ta hi April ni 10, 1990 khan din a ni.

Gilead Special School hian tun dinhmunah vohbik zirlai 135 enkawl mekin, heng zinga 30 chuangte hi Autism Spectrum Disorder (ASD)  nei naupangte an ni a. Hmunhma an neih zau tawk loh avangin an duh angin zirlai an la thei lo a ni. Hosteller 32 an nei a, avaiin thawktu mi 50 bawr vel an nei mek a. Zirna pangngai bakah Vocational Training Centre leh Adult Recreational Centre-te an kalpui bawk.  

Autism Acceptance Month hi United Nations ruahmannain kum 2007 atang khan hman tan a ni a. Autism chungchanga hriattur pawimawhte, a veite hriatthiamna leh tawiawm a tulzia inzirtir thin a ni a. Autism Spectrum Disorder (ASD) neite leh an chhungte harsatna tawh chungchang inhrilhhriat bakah, khawtlang anga tawiawm tulnate inzirtir nana hman a ni. Hemi pual hian April ni 2, 2025 atang khan hun hman a lo ni tawh a ni.