4764/2024-2025

Aizawl, the 22nd March, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan 5th Battalion, Rajput Regiment te'n an kum 200 dinchampha, Prachand Paanch (1825-2025) hriatrengna puala Postal Stamp leh special cover an siam chu Aravali Auditorium, New Delhi-a Bicentenary Special Sainik Sammelan neihah a tlangzarh. 

He huna thu a sawinaah Larsap General (Dr) Vijay Kumar Singh (Retd) chuan 5th Battalion, Rajput Regiment te'n kum 200 lai huaisen taka ram rawngbawl hna an thawk tling ta chu chhuanawm a tih thu sawiin, "Indian Army hnuaia Infantry Unit-in kum 200 lai ram tana hna an thawk thei chu thil thleng zen zen ngai lo a ni," a ti a. 5th Battalion, Rajput Regiment-te chu an hmalam hunah tun aia hlawhtlinna leh chawimawina nasa zawk an hmuh ngei theih nan duhsakna a hlan a ni. 

Larsap chuan 5th Battalion, Rajput Regiment-te chu an hmalakna reng rengah Indian Army kalphung leh nihna zia chhawmnung zel turin a fuih a. Postal Stamp neih theih nana Department of Posts leh Addl. Directorate General of Postal Services-te tawiawmna fakawm a tih thu pawh sawiin, postal stamp chu 5th Battalion, Rajput Regiment-te sulhnu ropui tak takte hriatrengna mai bakah, an huaisen zia khawvel hriata pholanna tur a nih thu a sawi bawk.