4763/2024-2025

Saitual, the 22nd March, 2025: Vawiin chawhnu khan DC Conference Hall, Saitualah DAMC Chairman, District Bawrhsap ni bawk Dr. Lalngura Tlau kaihhruainain Saitual District-a Secondary Collection Centre (SCC) Supervisor te chuan training an nei.    

He hunah hian DAMC Chairman Dr. Lalngura Tlau chuan inlawmna thu sawiin, Saitual District chu felfai taka hma an lak thin avangin Mizorama MAMB te pawhin beiseina sang tak an nei a ni, a ti. Bawrhsap chuan sawrkarin ruahmanna thar a siam angin SCC Coordinator te chuan District Level-ah an telpui tawh dawn lo tih a sawi a, State level atanga an vil tawh dawn avangin District lamah pawh chhel tak leh rim taka hna thawh a tul dawn a ni, a ti. 

Dr. Lalngura Tlau chuan Saitual District-a SCC pasarih te chu an hnathawhna kawngah inngaichang zel turin a fuih a, buaina tam tak pumpelh a nih theih nan information pek chhuah kawngah pawh fimkhur turin a chah nghal a ni. Bawrhsap chuan SCC supervisor te thawhrimna chu chhuanawm a tih thu a sawiin, training hlawk thlak tak nei a, zawhna te pawh inhawng taka zawt tur a sawm nghal a. Midangte tana malsawmna ni tura theih tawp chhuah tlang turin SCC supervisor te, DAMC member te leh line department hotute chu DAMC Chairman chuan a ngen a ni.

Vawiin SCC Supervisor training hi DAMC Chairman, District Bawrhsap ni bawk Dr. Lalngura Tlau chuan a kai hruai a, SCC atanga thlai lei leh hralh chhuah dan report hi Pi Hmangaihthangi Renthlei, DAO & Member Secretary DAMC hnen atangin ngaihthlak a ni bawk. Zirtirna pe tura ruat bik (resource person) Pu Lalnunpuia, SCC Coordinator chuan zirtirna a pe a, zawhna leh chhanna hun hman nghal a ni.

Training-ah hian SCC hrang hrang atanga supervisor te bakah Pu Benjamin Chhakchhuak, Co-opted Member DAMC, Pu Malsawmtluanga, SCC Coordinator, Pu Zairemkima, DCSO, Pu Jacob Lalmalsawma, DHO, PU David Lalchhuanawma, AE, DRDO leh Pi F. Zodingpuii, DIPRO te an tel a ni.