1788/2026-2027

Aizawl, the 14th August, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Art & Culture Department buatsaih, India ram thendarh anih avanga mipuite harsatna tawh hrang hrangte hriatrengna, "Partition Horrors Remembrance Day, 2026" chu Khuallian niin Vanapa Hall-ah a hmanpui.

Larsap General (Dr) Vijay Kumar Singh chuan India ram thendarhna "Partition of India" chu India ram chanchina hun hrehawm leh lungchhiat thlak berte zinga mi a nih thu sawiin,, mipuite tawrhna nasa tak thleng chuan ram pum nasa takin a nghawng a ni, a ti a. Tun hi thinlung hliam tih nun thar tumna leh midang demna hun a ni tawh lova, khatih hunlaia mipui tawrhnate hre renga, an chhelzia ngaihhlut bakah hetiang thil duhawm lo hi kan ramah a thlen tawh loh nana kan intiam tharna hun a ni, a ti a. Thehdarh kan tawh avanga harsatna hrang hrangte sawiin, hemi avang hian mi maktaduai 10-14 vel mahni in lum kalsanin an pem darh a, chhungkaw inthen leh khawtlang pem runpuite thlengin pawisawi lo mi tam takin nunna an chan phah a ni, a ti bawk.

Larsap chuan India thehdarh chu pumpelh theih a nih thu leh India awptu leh tih chak loh duhtute avanga kal tlangpui anih tak dante sawiin, chawpchilh takin ramri kham a ni a, hei hian pawi thui tak, ser reh thei tawh lo a siam a, Chittagong Hill Tract then darh anih avangin Zo Chin thahnem takte pawh then hran an ni, a ti a. India chu ram inpumkhat, kan nihna pawh thuhmun a ni tihah chiang tura zirlaite chahin, kan inpumkhat tlatna hian hma lam min pan tir dawn a ni, a ti a. India-in tunhma zawng aia hmasawnna a hmuh nasat thu sawiin, inhmuh thiam loh thinnate kan dah bova kan tanrual phawt chuan hmasawnna tam zawk kan hmu thei, danglamna kara kan inpumkhatna hi India chakna hnar a ni, a ti a. Thalaite chu state leh ram pum tana tangkai leh innghahna tur an nih thu sawiin, thuthang dik lo leh ngaihtuahna hruai kawi thei laka fimkhur turin a chah a. India ram thil lo thleng tawhte ngaihvena fimkhur taka midangte hlan chhawng thin turte, zalenna, dawhtheihna, inunauna leh inzahtawnnate nunpui tlat turin a chah bawk.

He hunah hian Pu T.C. Lalkhuma, Joint Secretary, Art & Culture Department chuan kalkhawmte lawmna thu a sawi a. Institute of Mizoram Fine Arts (IMFA) ten Mizo musical instrument hrang hrang hmangin ram leh hnam hla mawi taka an rem bakah Esther Hnamte, Awardee, Pradhan Mantri Rastriya Bal Puraskar-in ram leh hnam hla mawi takin a sa bawk a. India ram then darh chungchang short movie thlir ho a ni a. Pi Carol VLMS Dawngkimi, Director, Art & Culture Department-in lawmthu sawiin hun hman a khar a. Hemi hnu hian Larsap-in hemi puala buatsaih exhibition a tlawh nghal bawk.

He hunah hian official, zirtirtu leh zirlai thahnem tak an tel a ni.