1787/2026-2027

Dated Aizawl, the 14 August 2026: Vawiin khan Aizawl District Treasury hotute leh Kohhran hrang hrang headquarters 34 aiawh kalkhawmte chuan Assembly Annex Conference Hall, Treasury Square-ah, Pi Malsawmdawngliani (Director, Local Fund Audit & Pension, A&T) hovin, dan lova pension/family pension lâk tih reh dan tur chungchang inhrilhhriatna hun an hmang a. Dan lova family pension la mek ten Sawrkar hun tiam, kumin September ni 30 ral hmain, anmahni duhthu ngeia an tihtawp (surrender) theih nana hmalakho dan turte leh dan lova pension/family pension lak zui zelin a nghawng pawi thei tur chi hrang rhangte an zirho nghal bawk.

He hunah hian resource person Pi Malsawmdawngliani (Director, Local Fund Audit & Pension, A&T) chuan zirtirna pein, Dan ang taka pension lak theihdan te leh chumi hrul chiaha dan lo va pension/family pension lak awm thinte chu case-study hmangin a tarlang a. Resource Person hian, Mahni duhthu ngeia in surrender-te chu sawrkarin a ngaihhnathiam tur thu leh, pawisa rulhtir an nih dawn loh thu a sawi a.Hetih rual hian, September 2026 hnu lamah chuan ngaihhnathiamna awm tawh lovin, court lamah dan hmangin BNS emaw BNSS hnuaiah thubuai rip tak siamsak an nih tur thu leh Pawisa chawi bakah jail tan thlengin dan hnuaiah hmalak a nih tawh tur thu a sawi a ni.

Director chuan Dan lova family pension la mekte chu in surrender tura ngenin, pension an lâkna ṭheuh Treasury Office ah surrender-na form hmanga an PPO-te pe kir turin a sawm a. Hun tiam a ral hnuah chuan Task Force hmanga endik hna thawh tur a ni tawh dawn tih sawiin, “Document diklo pe chhuaktute thlengin, dan ang taka an chunga hmalak a ni tawh dawn a ni” a ti a. Hemi kawnga sawrkar ṭawiawm tlat turin Kohhran hrang hrangte, VC leh Local Council bakah Tlawmngaipawl leh sawrkar hnathawk zawng zawngte chu a sawm nghal a ni.

Resource Person-in zirtirna a pek hnu hian sawihona hlawkthlak tak neih zui a ni a. Dan lo va pension/family pension lak chungchanga Kohhran te, Village/Local Council leh YMA bâkah sawrkar department hrang hrangte mawhphurhna pawimawhzia sawiho niin, Treasury hotute chuan Kohhran hruaitute chu, an mi leh sâte dinhmun (nupui/pasal neih emaw pian/thih ni leh eizawnna thu ah te) sawrkara thehluh tur hriatpuina lehkha diktak chauh pe chhuak hram turin an ngen a. Kohhran hotute pawhin, an theih ang anga Sawrkar an thawhpui tur thu an sawi bawk.

CCS (Pension) Rules, 1972-in a tarlan ang chuan, a hnuaia mite hian family pension an la thei tawh lo:

1. Family pension la mekin nupui/pasal a neih leh chuan family pension a la thei tawh lo.
2. Sawrkar hnathawk fa hrin ni lo emaw, dan ang taka fa lak ni lo, birth certificate lem siama family pension la te.
3. Sawrkar hnathawk ni reng si, mahni nu emaw pa emaw fate emaw family pension la te.
4. Pensioner ni reng si, mahni nu emaw pa emaw fate family pension la te.
5. Pasal nei reng chung si, pasal neilo anga in ziah a, nu/pa emaw pasal a sûn tâkte family pension la te.
6. Family pension lâk duh avanga mahni nu leh pate thih ni emaw, pasal te thih ni / inthen ni tidanglama family pension la te.
7. Thla khata pawisa lâkluh zawng zawng belhkhawm a, monthly minimum pension @ Rs. 8700 plus DR income nei pha, tun dinhmunah chuan Rs. 12702 la tling te.

State chhunga District tinah leh block hrang hrangah Treasury Office tinahte pawh 'voluntary surrender of pension payment order' chungchanga inhrilhhriatna (sensitisation) hi neih mek zel a ni a. Vawiina hun hman hi Dr.Lalzahawma, Aizawl North Treasury Officer in kaihhruaiin, Aizawl South Treasury Officer Pu Allen VL Pundir chuan lawmthu sawiin hun hi a khar a ni.