289/2025-2026

Aizawl, the 23rd April, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Mizoram Sawrkar hnuaia Agriculture leh Horticulture Department hotute chu Raj Bhavan-ah kawm a. He hunah hian Sustainable Agriculture a awm theih nana pawimawh leh Department pahnihte hmalakna a sawipui a ni.

Larsap General (Dr) Vijay Kumar Singh (Retd) chuan Sustainable Agriculture nei tura hmalak a tul thu sawiin, hmalakna tlo leh tluantling, thing leh mau tichereu lo leh leilung tichhe lo thei ang bera eizawnna kalpui a tul a, hei hi tun mai nilo nakin hun thlenga pawimawh a ni, a ti a. Fertilizer tel lo thlai thar chhuah kawngah tanlak nasat a tul thu sawiin, organic thlai a ni ngei a ni tih finfiahna hmun, Laboratory leh standard tha tak state puala neih a tul thu a sawi bawk.

Larsap chuan loneitute'n hlawkna tam zawk an dawn theih nan supply chain mumal tak, a kara midang inzep leh hlawkna tam zawk hlep thin an awm loh nana ruahman a pawimawh thu a sawi a. Thlai thar sawngbawlna leh thil hlu zawk a chantir kawnga tanlak thar a pawimawh thu pawh sawiin, Department pahnih hotute chu Central leh State chhunga Line Department dangte nena inrawna ruahmanna tha zawk ngaihtuah zel turin a chah a ni.

Pi Ramdinliani, Special Secretary, Agriculture & Horticultulure Department chuan Mizoram pum zau zawng (geographical area) za zela 10 chu Agriculture leh Horticulture hnuaia hmalakna a nih thu a sawi a Department hnuaia scheme leh project hrang hrang kalpui mekte tarlangin, tlangram lo neih kum tina thlak thin bansan tura hmalak dante a sawifiah a ni.

He hunah hian Agriculture Department leh Horticulture Department hnuaia Scheme hrang hrang hnuaia hmalakte thlir ho a ni a. Organic state ni thei tura pawimawhte sawiho niin, thlai hrisel tam zawk thar kawnga hmalak tulte bakah a sawngbawlna kawnga tanlak ngaihna laite sawiho a ni a. Organic certification nei tur leh, a nei tawhte tinung thar leh tura senso ngai tam thin lutuk sutkian nan State Certification Body neih a tul thute, Sawrkar laipui duhdan anga Cluster based farming leh lei titha leh tura hamlaknate sawiho a ni a. Sawhthing sawngbawlna tur Integrated Processing Unit 2 din tura hmalak mek a nih thute, a channa (slicer) 22 leh phorona (solar dryer) 22 ve ve nei tura hmalak a nih thu tarlan a ni a. Tun dinhmunah Mizoramah organic certified area 8,000 Hectare a awm mek thu leh 5,500 Hectare dang pawh ruahman mek a nih thu he hunah hian tarlan a ni bawk.

Vawiin meeting-ah hian Agriculture Director Pu R. Lalnunzira, Horticulture Director Pu CH Lalmuanpuia leh Department pahnih senior officer-te an tel a ni.