4886/2025-2026 

Aizawl, the 17th March, 2026 : Mizoram Larsap General (Dr) Vijay Kumar Singh, PVSM, AVSM, YSM (Retd) chuan India hmarchhak state-te tlawha lokal Centre for Contemporary China Studies (CCCS) Multi-disciplinary Team, Ministry of External Affairs-te chu vawiin khan Lok Bhavan, Aizawlah a kawm.

Larsap General (Dr) Vijay Kumar Singh chuan Centre for Contemporary China Studies (CCCS) te chu hna pawimawh tak thawktu an nih thu sawiin, an kal sual loh nan khawtual dinhmun leh ngaihdante zir chiang hmasa turin a chah a. Mipuite hriat chian hmasak chu thutlukna dik siam kawnga pawimawh a nih thu a sawi a. Mizoram chu agriculture-a innghat leh chhiah lakluh tlemna anih thu sawiin, state thang mek, hmasawnna ruhrel din chhoh mekna a nih thu a sawi a. Hmasawnna pawh chak taka kalpui mek a nih thu a sawi bawk.

Larsap chuan Mizoram chu khawtlang inkaihhruaina nei tha tak, India rama state ralmuang berte zinga mi, hnam bil inkara inepna lian tham awm lohna, politic ngelnghet tak awmna a ni, a ti a. Tunhnaiah Mizoram chanchina vawi khat nan Aizawl chu India railway map-ah a lan thu sawiin, Kaladan Multi-Modal Transit Project (KMMTTP) nen thlunzawmin Mizoram chhim tawp thleng rel kawng siam tum a ni a, hei hian India hmarchhak hmel hmang a thlak danglam dawn a ni, a ti a. Sawrkar laipui scheme Vibrant Villages Programme hmangin hmarchhak state ramri dep khuate tihhmasawn tum a ni a, hei hian ramriah hmasawnna a thlen dawn tih a sawi bawk.

CCCS Team hi Pi Aparna Ray, Joint Secretary, CCCS & PPR, Ministry of External Affairs chuan hovin nih hnih cham turin nimin khan Mizoram an lo thleng a. Larsap hnenah hian an thil hmuh leh hriatte an hrilh a, zawhna an neihte zawtin hun hlawkthlak tak an hmang a ni.

Centre for Contemporary China Studies (CCCS), hi Ministry of External Affairs thluak bur pawimawh tak niin, China dinhmun leh hmalaknate zirchianga a tul anga Sawrkar Department hrang hrangte hnena hmalak dan tur kawhhmuha thurawn petu a ni.

CCCS hnuaia thiamna hrang hrang nei member 12 awmna Multi-disciplinary Team chuan March ni 9-18, 2026 chhungin hmarchhak state-te an tlawh kual a. Indo-Myanmar ramri depte tlawhin thil nih dante an zir chiang a, khawtual mi leh district thuneitute kawmin thil awm dan an zirchiang thin a ni.