Mizoram Larsap Pu PS Sreedharan Pillai chuan vawiin khan Chakma Autonomous District Council (CADC) hmunpui, Chawngte (Kamalanagar) a tlawh.

Larsap hi Lady Governor Pi Reetha Sreedharan chuan tawiawmin, zing dar 11:15-ah helicopter-in Chawngte an thleng a. Lawngtlai District Police-in guard of honour lo pein, Tuichawng bialtu MLA Dr BD Chakma, Lawngtlai Bawrhsap Pi Shashanka Ala, IAS, CADC CEM Pu Rasik Mohan Chakma, Lawngtlai SP Pu Amit Goel, IPS leh official dangte'n an lo dawngsawng a ni.

CADC Rest House tuala amah lawmna inkhawm buatsaihah Larsap Pu PS Sreedharan Pillai chuan India rama hmun kilkhawr berte zinga mi Chakma Autonomous District Council (ADC) tlawh theia a awm chu lawmawm a tih thu a sawi a. India mi tawh phawt chuan ram Danpui hnuaiah dikna chanvo inang tlang vek kan nei a, hmun kilkhawr bera mi pawhin khawpuia mite ang bawkin hriselna, zirna, inkal pawhna leh inbiak pawhna tha kan phu vek a ni, a ti a. Hma sawnna kawnga CADC huam chhung an la hnufual bik hle chu pawi a tih thu sawiin, political party hrang hrangte chu pawl bik sawi lova lung rual taka an thawh ho phawt chuan hmun hnufual ni reng bik lovin, hma sawnna nasa tak a thleng thei dawn tih hriaa tum thuhmun neia thawk turin a chah.

He hunah hian CADC Chief Executive Member (CEM) Pu Rasik Mohan Chakma chuan inlawmna thu sawiin, CADC dinhmun tlangpui a tar lang a. Tuichawng bialtu MLA Dr BD Chakma pawhin thu sawiin, ADC-te'n thuneihna sang zawk an neih theih nana hma lakpui turin Larsap hi a ngen a ni.

Larsap leh a nupui hi lo lawm nan Chakma hnam thil hlan an ni a. Chakma cultural troupe te'n hnam lam an entir a. Lawngtlai Bawrhsap Pi Shashanka Ala, IAS chuan lawm thu a sawi bawk.

Larsap lawmna inkhawm hman zawh hian CADC Rest House-ah tlawmngai pawl leh political party hrang hrang hruaitute leh CADC lam hotute nen inkawm hona hun buatsaih a ni a. Hemi hnu hian Larsap chuan Chawngte Community Health Centre tlawhin, an dinhmun a en a. Chawhnu dar 2:30-ah Aizawl lam panin helicopter-in an thlawk chhuak leh nghal a ni.