2274/2025-2026

Aizawl, the 18th November, 2025: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan International Year of Cooperatives 2025 puala NABARD Mizoram Regional Office-in 'Cooperatives Build a Better World' tih thupui hmanga an buatsaih, Cooperative Conclave 2025, Hotel Regency Conference Hall, Aizawla neih chu Khuallian niin a hmanpui.

Larsap General (Dr) Vijay Kumar Singh chuan khawtlang thuamchak leh tihhmasawn kawnga Cooperative-te hmalakna fakawm a tih thu sawiin, Mizo khawtlang chu tunhma atang tawha thawhhona tha nei a nih avangin Mizoramah Cooperative hlawhtlin lohna chhan tur a awm loh thu a sawi a. Hmanrua, inkaihhruaina leh hmalakna enzuina tha bakah tun aia taima lehzuala tanlakna hmangin Cooperation harhtharna hlawhtling tak kan kalpui thei a ni, a ti a. India chu khawvela cooperative inzarpharhna ram lian ber a nih thu leh, cooperative society nuai riat leh singli, member vaibelchhe 29 awmna a neih mek thu sawiin, MPACS, FPO leh SHG te tha taka kan kaihhruaia, thil dehchhuah hralhna tha tak kan ruahman sak phawt chuan kawng hrang hrangah hmahruaitu kan ni thei a ni, a ti a. Thlai thar chhuahte a hringa hralh mai bakah, a sawngbawlna lam kan uar deuh deuh a tul thu sawiin, organic thla thar chhuah tam deuh deuh a tul thu a sawi bawk.

Larsap chuan February, 2023 atanga kalpui, MPACS tihhlawhtlinna kawnga Mizoram hmalaknate tarlangin, hmun kilkhawr leh kalpawh harsa zawkahte pawh PACS Computerisation Scheme hlawhtling taka kalpui a ni chu lawmawm a tih thu sawiin, March ni 31, 2026 ral hma ngeia MPACS 216 din hman a nih ngei a beisei thu a sawi a. Cooperative society hrang hrangah rintlak leh langtlanga hna thawh a pawimawh tih sawiin, MPACS tum a hlawhtlin theih nan hmeichhia leh thalai tam zawk an tel a tul thu leh, ram leilung tichhelo zawnga hmalak a tul thu a sawi a. Kalkhawmte chu loneitu leh rethei zawkte Cooperative hartharna hmanga chawikan tuma theihtawp chhuah turin a chah bawk.

Pu Udit Prakash Rai, Commissioner & Secretary, Cooperation Department pawhin thu sawiin, Cooperative sector tana 'State Cooperative Policy' siam chu peihfel thuai a nih dawn thu a sawi a. Right of First Refusal kaltlangin MPACS-te thliarfel an ni tih sawiin, federation dang - MULCO, PIGFED, POULTRYFED leh ZOFISHFED-te tanpuina tur pawh ruahmannaah hian telh a ni, a ti a. Ministry of Cooperation kalphung thar hnuaiah digitisation-in nasa taka hma a sawn thu pawh tarlangin, tun dinhmunah PACS 24 chu online-a kalpui a ni tawh a, kum 2027-ah chuan PACS zawng zawng computerise vek turin chak taka hmalak mek a ni, a ti bawk.

He hunah hian Pi Pankaja Borah, GM & OIC, NABARD Mizoram Regional Office chuan inlawmna thu a sawi a. Pu T.Lhungdim, GM & OIC, RBI Aizawl Office, Pu Mayur Bora, Author, Social Commentator & former Development Banker leh MPACS hotute hnen atangin thusawi ngaihthlak a ni a. Larsap-in NABARD siam 'MPACS Awareness Video' a tlangzarh bakah MPACS hna thawk tha, Khanpui MPACS Ltd., Luangmual MPACS, Champhai LAMPS leh Champhai Town MPACS Ltd.-te hnenah chawimawina citation a hlan a. Pu John L.T. Sanga, Registrar of Cooperative Society-in lawmthu sawiin hun hman a khar a ni.

Cooperative Conclave, 2025 ah hian Agriculture Secretary Pi Ramdinliani, Horticulture Secretary Pi Maria C.T. Zuali, Cooperative hruaitute leh hemi lam kaihhnawih hrang hrang aiawhte an tel a ni.