Mizoram Larsap Pu PS Sreedharan Pillai chuan vawiin khan Lawngtlai a tlawh.

Larsap hi Lady Governor Pi Reetha Sreedharan chuan tawiawmin, zing dar 9:50-ah helicopter-in Lawngtlai an thleng a. Lawngtlai District Police-in guard of honour lo pein, Lawngtlai Bawrhsap Pi Shashanka Ala, IAS, LADC CEM Pu T. Zakunga, LADC Chairman Pu V. Zirsanga, Lawngtlai SP Pu Amit Goel, IPS leh official dangte'n an lo dawngsawng a ni.

LADC Complex-a amah lawmna inkhawm buatsaihah Larsap Pu PS Sreedharan Pillai chuan Mizoram Governor-a a thut tan atangin Mizorama Autonomous District Council (ADC) pathumte tlawh chhuah chu a tum lawk a nih thu leh tuna a tihlawhtling thei ta chu lawmawm a tih thu a sawi a. Mi tin huap zo leh ban phak hma sawnna atana hna thawh chu ram hruaitute leh sawrkar hna thawkte leh political party zawng zawng mawhphurhna a nih thu sawiin, democracy ram kan nih angin mipui hamthatna leh mipui duh dan chu a lal ber tur a ni, a ti a. Thingtlang kilkhawr ber thlenga inkal pawhna kawngpui tha sial chu ngaih pawimawh hmasak a tul thu a sawi. 

India ram Danpuiin Sixth Schedule hnuaia Governor mawhphurhna a pek angin, District Council huam chhunga chengte hma sawnna atan theih tawp chhuah a tum thu sawiin, ram mipuite chu thawh hopuiah a sawm a. An harsatna leh an duh dante a hnena thlen thin turin a chah.

He hunah hian LADC-a Executive Secretary Pu H. Lalramenga'n inlawmna thu a sawi a. LADC Chief Executive Member (CEM) Pu T. Zakunga chuan Larsap-in LADC a tlawh chu Lai fate tan hun chhinchhiah tlak tak a ni tih sawiin, LADC hnuaia hma sawnna hna thawh tlangpui a tar lang a. LADC-a hna ruak awm hnawh khah leh thawktu siksawi khapna September ni 13, 2019-a tihchhuah chu tluang taka hna thawh a nih theih nana sut tur leh LADC hnuaia hma sawnna hna thawhna tur sum tam zawk state sawrkar atanga hmuh a nih theih nana hma lakpui turin Larsap chu a ngen nghal bawk.

Larsap leh a nupui hi lo lawm nan Lai hnam thuam hlan an ni a. Lai cultural troupe chuan Lai hnam lam 'pawh loh tlawh' an entir a. Lawngtlai Bawrhsap Pi Shashanka Ala, IAS chuan lawm thu a sawi bawk.

Amah lawmna inkhawm hman zawh hian Larsap chuan District Hospital Lawngtlai tlawhin, an dinhmun a enfiah a. Chumi hnuah KMMTTP kawngpui sial mek chu AOC Veng atanga Chandmary thleng zawhin, Circuit House-ah tlawmngai pawl, kohhran leh political party hrang hrang hruaitute leh LADC lam hotute bakah, state sawrkar hnuaia department hotute nen inkawm hona hun buatsaih leh a ni a. Hemi chhung hian Lady Governor chuan Southern Standard Middle School leh Lairam Motherless Home te a lo tlawh ve bawk a. Hemi hnu hian Siaha lam panin helicopter-in an thlawk chhuak leh nghal a ni.