Mizoram Larsap Pu Vakkom Purushothaman chuan vawiin khan Mamit a tlawh a. Official a lo hmuahna, SP Office tualzawlah zahna chibai (Guard of Honour) lo hlan in SSA Pipe Band ten hnam hla an lo rem a ni.

Larsap lawmna inkhawm, Chhim Veng YMA Hall a buatsaihah Larsap chuan thusawiin Aizawl khawpui pawn a tlawh vawi 2-na huna an lo chawimawi danah lawmthu a sawi a. Mizoram leilung mawina leh hausakna hi hman tangkai thiam chuan khualzin tam tak hip luh theihna leh chumi atanga sum tam zawk hailuh theihna a nih thu tarlangin Zirna lamah pawh Aizawl chauh nilovin hmun dangte pawh an san thu a sawi a. Zirlai naupangte pawh an zirna kawngah nasa leh zuala zira thiamna pawchhuak ngei tur leh University tha tak tak a lut tura in buatsaih turin a chah a ni.

Larsap chuan Mizoten hnam lam mawi tak tak kan neih chu chhuangin hei hi vawng nung reng tur leh state pawn thlenga pho chhuak thin turin a chah bawk a ni.

Larsap chuan Sakhua-ah Secular state kan nih angin eng sakhua pawh vuan ila, sakhaw dang vuantute lakah rilru zau tak kan put a tul thu a sawi a. Hetih rual hian Mizoten fahrah enkawlna In leh mi harsate tanpui duhna thinlung an pu hi a ropui tak zet a ni a ti bawk.

Larsap lawmna hunah hian Pu A. Biaklawma Additional DC Mamit-in lo lawmna thu sawiin District aiawh a lawmthu sawina hun Pu P.C. Lalthanzuala President, Bazar Veng Village Council in a hmang a. Hnam lam chi hrang hrang entirna buatsaih a ni bawk.

Mizoram Larsap hi a nupui Dr. Lily Purushothaman, Pu K. Lalnghinglova, Secretary to Governor, Pu Narayan Thapa MPS, ADC to Governor ten an tawiawm a ni.