498/2026-2027

Aizawl, the 13th May, 2026: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan nimin khan SDGI Global University, Ghaziabad, Uttar Pradesh, Convocation hmasa ber chu Khuallian niin a hmanpui. Prof. K.K. Aggarwal, President of South Asian University chu Khualzahawm a ni.

He huna thu a sawinaah Larsap General (Dr) Vijay Kumar Singh chuan SDGI Global University-in Convocation hmasa ber a thleng thei chu lawmawm a tih thu leh chhinchhiah tlak a tih thu sawiin, bul an tan tawhna chu tawpsan mai lova chhawmnung zel turin a fuih a. Convocation hmasa ber hmangtu zirlaite chu dinna nghet tak nei an nih tawh avangin hmun danga an kal darh hunah pawh inrintawkna nei turin a chah a. Beih hram hramna, inthununna, taimakna leh dawhtheihna neia tum sang tak nei tur leh, a eng zawnga thil thlira an hma zawna chona awmte beiseina nena hmachhawn zel turin a fuih a. Zirlai nu leh pate chu an fate an tuina zawnah kal tir tur leh an hlawhtlin ngei theih nana tawiawm tlat thin turin a chah bawk.

SDGI Global University, Ghaziabad hi Uttar Pradesh Private University Act, 2019 hnuaiah July ni 14, 2023 khan din niin, Sundar Deep Educational Society-in a enkawl a. Uttar Pradesh-ah zirna sang zawk tihhmasawn nan kum 20 dawn an thawk tawh a; Engineering, Pharmacy, Architecture, Hotel Management, Law, Education, Commerce, Management, Polytechnic leh adangahte zirna kalpuiin zirlai 5,500 dawn SDGI University hian a nei mek a ni.

Prof. (Dr.) Parsanjeet Kumar, Vice Chancellor chuan kalkhawmte lawmna thu a sawi a. Khualzahawm Prof. K.K. Aggarwal, President of South Asian University leh Pu Mahender Aggarwal, Chancellor, SDGI Global University-te hnen atangin thusawi ngaihthlak a ni.

He hunah hian SDGI Global University Governing Body member, zirtirtu, zirlai leh nu leh pate an tel a ni.