4994/2025-2026

Aizawl, the 24th March, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan zanin khan Development Commissioner (Handlooms), Ministry of Textiles, Govt. of India, Sericulture Department, Govt. of Mizoram leh National Handloom Development Corporation (NHDC) te tangkawp buatsaih, Mizoram silk tihhmasawnna, thiamthil pholanna leh chawilarna "Tlangro : The Mizoram Silk Runway", Aijal Club Park-a neih chu Khuallian niin a hmanpui.

He hunah hian First Lady, Pi Bharti Singh pawh a tel a. Chief Secretary Pu Khilli Ram Meena leh Dr. Naresh Babu N, IFS, Joint Secretary (Technical) & CEO, Silk Mark Organisation of India (SMOI), Central Silk Board-te chu Khualzahawm an ni.

Larsap General (Dr) Vijay Kumar Singh chuan Sericulture Department chu theihna nasa tak nei leh hai chhuah tur pawh la nei nasa a nih thu a sawi a. Mizoram chu silk chi 4 - mulberry, eri, muga leh oak tasar thar chhuahna state anih thu sawiin, Silk hrang hrang thar chhuah tamna khawpui ni turin theihna kan nei a, hemi tur hian tan erawh kan lak nasat lehzual a tul a ni, a ti a. Mizoram chu silk pangang khawi nana sik leh sa duhawm tak nei anih thu sawiin, khawvel pumah leilung nena inrem natural fibre silk mamawhna a sang zel a, hemi avang hian Mizoram Eri silk chu khawvel market-a hralh tla tur tak a ni, a ti a. Sericulture chu thingtlang hmasawnna leh hmeichhiate dawmkan nana inmil tak, hna dang nen pawha thawh kawp theih, sum lakluhna hnar tha tak anih thu a sawi a. Ei leh bara intodelh theihna, hnam ziarang vawnhimna leh hmasawnna ngelnghet dinna a nih thu sawiin, Mizoram hmasawn nana a fawng pawimawha siam turin pangang khawitu, sawrkar, zirbing mi leh khawtlang inkarah tanrualna tha neih a tul thu a sawi bawk.

Larsap chuan sericulture sector tihhmasawn nana pawimawh hrang hrangte tarlangin, inzirtirna changtlung, hmanraw tha zawk chhawpchhuah, tunlai thiamnate chhawr tangkai, hmasawnna ruhrel din leh a hralhna lam ngaihtuah, zirbingna nasa zawk neih, thalai tam zawk hip, sawrkar atanga tawiawmna tam zawk pek leh hmasawnna ngelnghet dinte chu ngaipawimawha neih hmasak a tul thu a sawi a. Hmar chhak state nena inzawmna thuk tak nei Muga silk thar chhuahah Mizoramin hma a hruai theih thu sawiin, a chaw tur thlai chin uar, Mizoram pual muga brand siama chawilar, pangang khawi inzirtirna changtlung zawk neih, mawihnai zawka chhuah thei tura sawngbawl, khualhip nana hman thiam, digital platform leh e-commerce nena thlunzawm, designer leh fashion industry-te nena thawhhona neih bakah, sawrkar puihna hmangtein Muga silk chawilar theih a nih thu a sawi bawk. 

He hunah hian Pi Florence Zotluangpuii, Secretary, Sericulture Department chuan kalkhawmte lawmna thu a sawi a. Fashion designer Tluangpuii Hmar leh Violeta by Sangzuali te kut chhuak silk thuam mawi tak takte phochhuah a ni a. Chief Secretary Pu Khilli Ram Meena leh Dr. Naresh Babu N, Joint Secretary (Tech.) & CEO, Silk Mark Organisation of India (SMOI), Central Silk Board-te hnen atangin thusawi ngaihthlak a ni a. Pu Lalrinawma, Director, Sericulture Department chuan lawmthu sawiin hun hman a khar a ni.