Nimin (11.12.2019) chawhnu dar 2:30Pm khan Mizoram Larsap Pu PS.Sreedhan Pillai leh Lady Governor Pi Reetha Sreedharan te chuan zanriakin Siaha an tlawh.

Ropui takin Mara Autonomous District Council kawtah ahmuahna programme buatsaih a ni a. He Larsap hmuahna inkhawm hi Pu K.Chhihrau, Secretary to MADC in a kaihruaia, Pu N.Zakhai CEM, MADC in Larsap te nupa chawnglawmna thu sawiin, Larsap te nupa hi Mara hnam thuam a present nghal bawk a ni.

Larsap chuan amah lawmna inkhawmah thusawiin, Mara ten hmasanga an khualtha te an lo hmuah thin anga, mara hnam zia rang pholang chunga amah ropui taka an lo hmuak chu lawmawm a tiin, in siaha boruak chauh a thiang lo, in mi chengte rilru pawh a thianghlim ngei ka ring a ni, a ti.

Larsap chuan Democracy ram kan ni angin, mipui duhdan hi a lal ber tur a ni a, mipui tana tha tur thil hi kan dah pawimawh hmasak ber fo tur a ni, a ti bawk.

Larsap chuan Political Party hrang hranga awm in ni a, In politic khel dan leh kalpui dan pawh a dang ngei ang. Mahse Political party reng rengin tum thuhmun in nei theuh, chu chu mipui rawngbawl hi a ni. Politics hmanga hmasawna rahbi kan tuk lai hian tumah kan thlauhthlak leh kan tlansan a thiang lo. Hmasawnna pawh mitin huapzo leh rualkhai a ni tur a ni. Hei hi a ni, kan Prime Minister zahawm tak pawhin a sawifo, Sabka saath Sabka Vikas, mitin thawhhona atanga hmasawnna rualkhai chu.

British awpbetna nghawngkawl atang kan talchhuahna hi Kum 70 chuang ni tawh mahse, kan hnampa Mahatma Gandhi in a Zalenna tluantling a ti chu , India ram mi te ber pawhin a nitin ei leh in, sil leh fen lungkham lova a awm hun hi a ni. India ram hi hmasang atanga sakhaw intluk tlanna leh zalenna, chitin, hnamtin leh tawngtin tuallenna ram a ni. Chuvangin Mara Autonomous District Council huam chhungah ngei pawh hian mitin in "Unity in Diversity" rau hi i chhawmnung zel ang u, a ti.

Larsap chuan ADC huamchhunga kawngpui chungchang te pawh Border Road Organization, Chief Engineer a sawipui tawh thu tarlangin, hmasawn tur chuan kawngpui tha a pawimawh a ni, a ti.

Larsap hmuahna programme-ah hian ECM New Colony Zaipawl ten hla remin, MADC Art& Culture Dept, in Mara hnamlam Sawlakia an entir a. Bawrhsap Pu Bhupesh Chaudhary IAS in lawmthu sawina in vawiin programme hi a khar ta a ni.

Larsap hian MADC kawta programme a hman zawh hian District Hospital tlawhin, damlo te tlawhkualin Krismas thilpek a hlan theuh hlawm a ni.

Circuit House-ah a amah pual zanriah chawhlui buatsaih ei hma-in, MADC hruaitute ,tlawmngai pawl hrang hrang te, Political Party hrang hrang te, VC te, Zirlai pawl te leh pawl dang te kawmna hun a hmang bawk a ni.