Project Pushpak chuan vawiin khan Pushpak Primary School, Falkland-ah a duh apiang tan a thlawna thisen pek leh inentirna hun "Medical cum Blood Donation Camp" an buatsaih a, Health & Family Welfare Minister Dr. R. Lalthangliana'n he hun hi a hmanpui a ni.

He hunah hian Dr. R. Lalthangliana chuan thusawiin, BRO ten an hna pangngai ramri a inkalpawhna kawng tha an siam piah lamah an hnathawhna hmun a mipui leh khawtlang tana thil tha tam tak an ti thin chu an fakawm takzet a ni a ti a, BRO in hriselna lam a hma an lakna kawng hrang hrangah Mizoram sawrkarin tanpui theihna a neih chuan a tlanchhe dawnlo a ni tih sawiin, Mizoramin hriselna kawnga hma a sawn theihna tur leh HIV/AIDS do kawnga thawhpui ah a sawm nghal a, Mizoram sawrkarin hriselna kawnga hma thar a lak chi hrang hrang a tarlang bawk a ni.

Project Pushpak Chief Engineer Pu MANV Prasad pawhin thusawiin BRO ten mipui vantlang hriselna leh hmasawnna atana an hnathawh chi hrang hrang a tarlang a ni.

Vawiin "Medical cum Blood Donation Camp" ah hian thisen unit 65 pek niin BRO, Falkland khawtlang mipuite leh CNES Pvt. Ltd, Falkland a thawk ten a thlawn in thisen hi an pe a, Aizawl Civil Hospital Blood Bank a thawkten an buaipui a ni.

RIPANS, Zemabawk, CMO(East), Aizawl leh BRO daktawr ten a thlawna inentirna hi buatsaih thungin mi 500 chuang an inentir a, natna chi hrang hrang Zunthlum, Thisen sang, hmeichhe natna chi hrang hrang, naupai leh nau neih chung changa harsatna hrang hrang, mit leh ha te endik a ni a. Khawl hmanga inentir ngai te pawh endik niin damdawi thlengin a thlawnin an pe vek a ni. Hei bakah hian BRO daktawr ten hriselna chungchang thil chi hrang hrang zirtirna an pe bawk a ni.