Vawiin khan Mizoram Larsap chhuak ta Dr. Kamla Beniwal chuan Mizoram chhuahsanin, Sorkar hotu pawimawhten an thlah a. Amah lo thlaktu tur Pu V.K. Duggal, IAS chu chhun dar 12:20 khan Lengpui Airport a lo thleng.

Larsap thar tur Pu V.K. Duggal IAS (Rtd.) hi Acting CM Minister Pu R. Lalzirliana, Finance Minister Pu Lalsawta, School Education Minister H. Rohluna leh UD&PA Minister Pu Zodintluanga te, Chief Secretary Pi L. Tochhong leh DGP Pu Dharmendra Kumar bakah Officer pawimawh dang ten an lo hmuak a. Kum 1976 chhunga Aizawl DC lo ni tawh Pu V.K. Duggal hian Mizoram chuan a lung a lenin, mahni khua a haw leh ang hiala a inngaih thu amah lo hmuaktute hnenah hian a sawi a ni.

Mizoram Governor thar tur hi zanin dar rukah Raj Bhawan Durbar Hall-ah Justice B.K.Sharma, Judge Guwahati High Court in Mizoram Governor ni tura rinawmna thutiam tirin a la lut ang.