Mizoram Council of Science, Technology & Environment leh Mizoram Science Society tawngkawpte chuan vawiin khan Aijal Club-ah Science leh Technology hmasawnna kalkawng ‘Trend Analysis of Science & Technology Development’ tih thupui hmangin sawihona Brainstorming Workshop an buatsaih.

Workshop kaihruaitu Dr. Tawnenga, Principal Pachhunga University College leh President, Mizoram Science Society ni bawk chuan Science leh Technology leh tunlai thiamna pung chak khawvelah hian ngaituahna sen tlan a, Science leh Technology hi engtin nge ram hmasawnna atan kan hman thiam theih ang tih te hi sawiho tha tiin Workshop hi buatsaih anih thu a sawi.

Thu hmahruai sawitu Pu Lalthlamuana, Chief Informatics Officer, ICT Department chuan Science leh Technology huangchhung thil hmuhchhuah/siamchhuah ‘Innovation’ pawimawh thu te sawiin Science & Technology Policy siam tha a tih thu te a sawi a ni.

Science leh Technology hmasawnna atana thu leh hla pawimawh te chhawpchhuah niin hemi chungchangah hian sawihona neih a ni bawk.

Workshop hi Mizoram Science Society Adviser – Dr. L.N.Tluanga, Er. Dunglena leh Dr. Kapthuama ten an hmanpui a ni.