2327/2024-2025

AIZAWL; the 1st October, 2024: Vawiin chawhnu 1:30 pm khan Mizoram Larsap thar Pu Indra Sena Reddy Nallu chuan Krishi Vigyan Kendra (KVK), Aizawl leh College of VSc & AH, Central Agricultural University (CAU) (I), Selesih a tlawh. Dr.Lalnuntluangi Hmar, Dean College of Vsc &AH, CAU(I), Selesih leh a thawhpui ten Larsap hi lo dawngsawngin, KVK faculty, staff leh Loneitu te nen KVK conference Hall-ah inkawmhona hun an hmang nghal.

He inkawmhona hunah hian Faculty member te hnenah an hmalak  mek leh hmachhawp te theuh zawtin,  thahnem ngai taka thawka, Mizoram Loneitu te tan hmasawnna rahbi tuk sak ngei turin a fuih hlawm a ni. Loneitu leh huanneitu lo tel ve te hnenah pawh  an hmalakna te zawtin, tam zawk leh hlawk zawk a an thlai leh thei te an tharchhuah a, an deh ral theih nan KVK lam mithiam te rawnna chang hre turin a chah hlawm a. Loneitu te pawhin tunlai thiamna mila an lo leh huan te, an ranvulh te an vulh theih nan Training a tel tam turin a chah hlawm a.KVK lam hotute hnenah pawh Ranvulh mi, Loneitu leh huan siam te tan Training hi uar zual sauh turin a chah hlawm bawk.

Larsap hian inkawmhona hun a hman zawhah KVK,Aizawl Exhibition  centre tlawh nghalin, KVK kaltlanga hmalakna  hrang hrang, Buh chi hrang hrang, thlai leh thei hring, pickle, hmanraw hrang hrang, Lei tha, Rannung thahna hlo, Leitha phul Drone etc. phohchhuah te chu a en nghal bawk a ni.

Larsap hian KVK,Aizawl demonstration farm te fangin, an soil testing Laboratory  te, Vermi-Compost unit te, Sangha dil te leh Thlaichinna greenhouse hrang hrang te a tlawh bawk a ni.

Larsap hian KVK a hun a hman zawh hian College of Vsc &AH, CAU(I) Farm a thlawh leh a.Ran chi hrang hrang:Bawng,Vawk,Kel,Beram te vulhna unit hrang hrang bakah Dept. of Livestock Production Management pawh a tlawh a, a thawktu te nen inkawmhona hun an hmang  bawk.