Government Mizoram Law College zirlai pawl Student Bar Council te huaihawt Freshers’ Day 2015 chu vawiin khan Lal Thanhawla Auditorium ah neih a ni a, Higher & Technical Education Minister Pu R.Romawia’n a hmanpui.

Khuallian Pu R.Romawia chuan thusawiin tunlai khawvelah mahni inven nan leh sahim nan dan leh hrai hriat a pawimawh dan te a tarlang a. Danpui lama mithiam Mizo ten kan la neih loh avanga harsatna tawh thin a nih thu te sawiin dan zirlaite chu law degree neih mai duhtawk lova ram mamawh phuhruk tura inbuatsaih turin a fuih a, zirlai ten an beisei leh hmathlir tihlawhtling ngei tura theihtawp chhuaha tan la zel turin a chah bawk.

Mizoram Law College Freshers’ Day hmanna ah hian Principal Dr Rualkhuma Colney pawhin thusawiin an College dinhmun tlangpui a tarlang a. Law College hi 1983 ah din niin 2004 ah Mizoram Law College ti-a hming thlak a ni a, kum 2013 ah Provincialised a ni. A din tirh atanga vawiin thlengin mi 345 ten LLB an passed chhuak tawh a, tunah hian zirlai 268 leh zirtirtu 13 an awm mek bawk a ni.