Vawiin hian Lawngtlai DC Conference Hall ah kumin kum tawp lama Lai Autonomous District Council General Election lo awm tur atana hman tur Draft Electoral Roll chu District Election Officer J. Hmingthanmawia’n a tlangzarh.

Pu J. Hmingthanmawia chuan, Lai Autonomous District Council (Constitution, Conduct of Business, etc) (Amendment Rules) 2014 in a phut angin; Mizoram State Election Commission chuan Electoral Roll buatsaih dan ruahmanna a duang a, chumi ang chuan vawiin hian Draft Electoral Rolls hi tlangzarh a ni. January ni 1 a MLA Summary Revision Roll chu March thla atanga August thla thleng then thianghlim a nih leh vek hnuin tun LADC MDC Electoral Draft Roll atan hian hman a ni ta a ni, a ti. A dik thei ang ber turin kan buatsaih a, amaherawh chu kan famkim vek bik lova tihsual palhte pawh kan lo nei ve thei tho a ni, chutiang te a lo awm palh a nih chuan a buaipuitute sual vang nilovin tihpalh vang liau liau a ni ang tih min hriat sak turin mipuite ka ngen a ni, a ti.

Naktuk Dt 2.9.2015 atanga 14.9.2015 chhungin Tribal nilo te leh boral tawh la paih silohte paihna hun hawn ani anga, chu hna chu khawtinah Village Level Officer hovin Village Level Standing Committee ten an buaipui ang. Dt 15.9.2015 atanga 9.10.2015 chhungin khawtin atanga siamthatna lo lutte chu Electoral Registration Officers ten an endik leh vek ang. Dt 10.10.2015 atangin chung siamthat ho list (Supplementary List) buaipui tan a ni tawh ang a, Dt 26.10.2015 ah Final Publication neih a ni dawn a ni.

Draft Rolls tlangzarh takin a tarlan dan chuan LADC MDC bial 25 ah Polling Stations 103 an awm a, vote thlak thei mihring 46,405 awmin an zinga 23,560 te hi hmeichhia an ni. Voters ngah ber Polling Station chu Lawngtlai III niin mi 1167 an awm a, a nei tlem chu chu Chamdurtlang II niin voters 66 an awm thung a ni.

Vawiina Draft MDC Electoral Roll tlangzarhna ah hian Pu Lallawmawma, MCS, Election Officer, Political Party aiawhte leh Chanchinbumite an tel a, District Election Officer Pu J. Hmingthanmawia hian Party tin aiawhte chu Draft Roll bu hi a hlan nghal a ni.

Attachment

  • Loading attachment...