Vawiin khan Mizoram State Law Commission chu an Chairman Pu R.Lalrinawma office chamber-ah ama kaihruaiin meeting pawimawh tak an nei a. Sorkar laipui duhdan angin Mizoram-ah ‘Gram Nyayalaya’ hman ve dan tur sawiho a ni.
He ruahmanna hi tihpuitlin a nih chuan khaw 2/3 emaw aia tam emaw tan court, a hmingah ‘Gram Nyayalaya’ an vuah chu din a ni ang a, he court hi Magistrate, a hming Nyayadhikari an vuah chuan a thut ang. Ani hian headquarters an siamsaka thubuai a ngaihtuah bakah a bial chhunga khaw hrang hrang te chu tlawh kualin mobile court te a hawng thin ang. Hei hi mipuiten awlsam zawk, rang zawk leh senso tlem thei ang bera dikna chanvo an chan theih nana sorkar laipui dan siam Gram Nyayalayas Act, 2008 tihpuitlinna tur a ni. He danin a tum ber chu India khua leh tui ten retheihna vang te, dinhmun hniam zawk nih vang te leh hetiang kaihhnawih avanga an dikna te palzuta a awm loh nan leh an kawtkaia an chanvo tur dik tak an chan theihna tura ruahmanna a ni. The Mizoram Heritage Conservation Bill, 2009 bakah thildang pawimawh tak tak an sawiho bawk.

Mizoram State Law Commission hi 4 March, 2009 khan din a ni a. Din a nih atangin meeting vawi 3 neih a ni tawh a, Mizoram pum huap thil pawimawh tak tak rel a ni thin a, hmachhawp engemawzat siam a ni bawk. Vawiina meeting-ah hian Member Secretary Pu Zahmingthanga Ralte, Dy. Secy. Law & Judicial chuan Commission hmalak tawh leh hmachhawp report a pe bawk.