Mizoram State Law Commission chu vawiin khan an Chairman Pu R.Lalrinawma, MLA hovin Secretariat Conference Hall ah thukhawm a. He hunah hian thu pawimawh tak tak an ngaihtuah a, chung zingah chuan an thu ngaihtuah kal lai mek Mizoram Forest Act, 1955 chu a hmangtu Forest Department-in famkim lo leh fel lohna lai tam tak awmin an hria a. Tha zawk leh fel zawka Forest leh a kaihhnawih humhalh leh thil tisualtu te hrem an nih ngei theih nana Dan famkim zawk ‘The Indian Forest Act, 1927’ Mizorama hman an rawt chu uluk takin Commission hian a ngaihtuah a. Uluk taka sawiho a nih hnuah The Indian Forest Act, 1927 hmang lovin Mizoram Forest Act, 1955 hi a tul angin amendment siam ni zawk se tih chu Commission ngaihdan a ni a, Sorkar ah recommendation siam ni se an ti.

Hei bakah hian dan dinglai thenkhat siamthat ngaite an en ho bawk a. Tin, Court Fee pek chungchanga Mizoram Bar Association thu thlen pawh an ngaihtuah a, Mizoram khua leh tui dik tak te tana tuna Rs 5,000 /- hman lai chu Rs 500 /- -a tihhniam tha an ti a, Sawrkar ah rawtna thlen ni se an ti. Tin, Court hniam zawka Court Fee pe tawh ten thiamloh changa an Appeal-in Court Fee pek leh a ngai thin a, hei hi mipui tan phurrit a ni a. Court hniam zawka Court Fee pe tawh ten an appeal chuan pe tawh kher lo se. Tin Sorkarin case a neihin Court Fee pe ve kher lo se thaa hriain Sawrkar ah rawtna thlen ni se an ti bawk.

He Meeting ah hian Commission Secretary Pu Zahmingthanga Ralte bakah Pu T.Saikunga, District & Sessions Judge, Aizawl, Law Department aiawh Pu Saingura Sailo, MADC CEM Pu R.T.Zachono, Bar Association aiawh Pu Michael Zothankhuma leh Member te Pu R.C.Thanga, Pu A.K.Rokhuma te bakah LADC aiawh te an tel bawka ni.