Vawiin khan Mizoram State Law Commission chu an Chairman Pu John Siamkunga hovin a office chamber-ah an thukhawm a, tun tum hi Commission thutkhawm vawi 32-na a ni.

Mizoram UT a nih kum 1972 atanga kum 2013 thlenga Dan siam tawhte zirho a ni a. Dan siam tawh leh siamthatna te nen hetih chhung hian Mizoram Assembly-in Dan 390 a lo passed tawh a. Dan tam berte hi la hman mek an nih laiin hman tawh loh tlem azawng bakah hman tul tawh lo, heng Appropriation Act kan tih ang chi te, thahnem tak a awm bawk a. Heng Dan hman tul tawh lo ho zawng hi chu repeal turin sorkarah recommendation siam nise tih an rel a, Dan thenkhat heng ‘The Mizoram Essential Services Maintenance Act, 1990’ ang te hi awlsam zawka hman a nih theih nan siamthat nise tih an rel bawk.

Chairman Pu John Siamkunga chuan member-te inpekna avangin Commission-in hna tha takin a thawk thin tih a sawi a. Department hrang hrangte pawh an Dan hman laite zirchiang lehzual se, fel zawka mipui rawngbawl theihna atan a tangkai a rin thu a sawi bawk.