SCERT Science Promotion Wing buatsaih - State Level Students Science Seminar 36-na chu vawiin khan Chanmari YMA Hall-ah neih niin, he hun hi School Education Minister Pu H. Roluna chuan a hmanpui a. He seminar-ah hian Mizoram District tin atang participant ten “Pulses for Sustainable Food Security: Prospectsand Challenges” tih thupui hmangin presentation pe in an in el a  ni.

School Education Minister chuan science thiamna tel lovin ram hmasawnna a kal theih loh thu sawiin, hemi kawnga thiamna tipung tura Science Seminar buatsaih a ni chu lawmawm a tih thu leh, zirlaite pawhin an hlawkpui ngei a beisei thu a sawi a. Kum tin topic hrang hrang ah inelna lo neih thin tawh niin, presenter-te leh an zirlai puite hriatna a zau phah mai bakah, tawng thiam thlengin a pui thin a ni, a ti a. Minister chuan zirlaite chu hmundang zirlaite nena inkhaikhin a, hnufual bik anga inngai lo tura chahin, an thiamna leh ngaihtuahna dangdai te chu ram tan tangkaia an hman theih thil a ni tih hre reng chunga tumruhna nen taima taka zir chho zel turin a chah a. An zirlaite chu hre satliah mai lovin, a nihphung chiang taka hriat tum tur a ni, a ti bawk.

Minister Pu H. Rohluna chuan science thiamna tihhmasawn nan SCERT in Seminar an buatsaih thin chu lawmawm a tih thu tarlangin, School Education Department pawhin theih ang angin Science thiamna tipung tura hma a lak thin thu a tarlang a. Sorkar enkawl Middle School-ah te chuan Science subject zirtir tura Science background nei an pawimawhzia Sorkarin hria in, Recruitment Rules siam that a nih thu a sawiin, Science leh Mathematics subject zirtirtu mi 100 chuang la turin ruahmanna a kal mek thu a sawi bawk.

Vawiin Seminar hawnna inkhawm hi Pi Laldawngliani Chawngthu, SCERT Director in kawihruaiin, Pi D. Ramdinthangi, Jt. Director, SCERT hnen atanga report tawi ngaihthlak a ni a. State Level Science Seminar a tel tur hian District tina District Level Students Science Seminar lo neih tawha titha thlan chhuahte an tel a. State Level inelnaa titha ber hi National Science Seminar, October thlaa Nehru Science Centre, Mumbai-a neih turah Mizoram aiawhin a kal dawn a ni. National Science Seminar Winner-te chu kum khat chhhung scholarship - thla tin Rs. 2000 an dawng thei a, mi 9 tan Special Prize - thla tin Rs.1000 kum khat chhung siam a ni bawk.

Vawiin Seminar ah hian pakhatna - J.Lalhmangaihzuali, Baptist Higher Secondary School, Serkawn, Lunglei, Pahnihna - Jonathan V.L Chhanhima, Govt. Chaltlang H/S Aizawl, Pathumna - Francis Laltlankima, St. Pauls Higher Secondary School, Tlangnuam, Aizawl. Best Guide Teacher ah C.Lalrinsanga, Baptist Higher Secondary School, Serkawn, Lunglei thlan a ni bawk.