Vawiin khan Mizo Academy of Letters (MAL) Jt. Headquarters Lunglei buatsaihin Sub Hqrs YMA Conference Hall-ah State Level Seminar ‘Lalzova leh F.Rokima Sulhnu Zirhona’ neih a ni a. Mizoram Legislative Assembly Speaker Pu Lalrinliana Sailo chu khuallian a ni. He hunah hian Lunglei HPC Vice Chairman Pu Lawmawma Tochhawng, Lunglei South AC MLA Dr K.Pachhunga, Lunglei DC Pi K.Lalrinzuali, SP Pu C.Lalthanmawia leh official dangte bakah NGO hruaitute, Lalzova leh F.Rokima thlahte leh zirlai thahnem tak an kalkhawm.

He hun Pu C. Hrangdula, President MAL Joint Hqrs Lunglei kaihhruaiah khuallian Pu Lalrinliana Sailo chuan Mizote zinga hla phuah thiam chhuanawm pahnih Lalzova leh F.Rokima sulhnu zirhona Seminar buatsaihtu MAL Jt Hqrs te chungah lawmthu a sawi a. State Level Seminar chu thu leh hla lama Mizo thalaite kaihruaitu ni zel tura a duh thu sawiin mipui kalkhawmte, a bik takin zirlaite chu Mizo literature ngaihhlut nachang hre thar turin a chah a. Mizo tawng kan hman dan chungchangah tan kan laka kan fimkhur thar a pawimawh thu sawiin tunlaiah hian social media lamah Mizo tawng kan hmang diklo nasa hle a, a dik zawnga tan kan lak zel a pawimawh a ni tiin Mizo Academy of Letters-te chu hemi kawnga hma hruaitu ni zel turin a chah a. Kan hranghlui ziak mite leh hla phuah thiamte lakah bat tam tak kan nei a ni tiin an thu leh hla hnutchhiah hlu takte ngaihlutu mithiam an lo chhuak zel chu thangtharte tan thil hlu tak a ni, a ti. A sawi zelnaah Speaker chuan khawvel changkang chho zelah leilung hausakna, thing leh mau te kan tih chereu nasat a vei takzet thu sawiin ram kan tihchhiat leh hemi avanga boruak, sik leh sa danglam nasa lutuk veng leh siamtha leh turin theihtawp a tan kan lak a tul a ni, a ti.

State Level Seminar ah hian Pu TC Jonusanga’n “F.Rokima leh a Sulhnu” tih thupui hmangin zirtirna pein Pi Lalsangpuii’n “Lalzova leh a Sulhnu” tih thupui hmangin zirtirna a pe a. Tin, Lalzova leh F.Rokima chhungte’n thusawina hun an hman bakah Zaithiam Lalenkawli Pautu leh Lalllawmzuali Ngente ten Lalzova leh F.Rokima te hla phuah sa in mipui kalkhawmte an awi a ni. Pu Gen Khan Do, SRO, Art and Culture Department in lawmthu sawina hun a hmang a ni.

Attachment

  • Loading attachment...