Vawiin khan Convention Centre, Lungleiah VIGILANCE AWARENESS WEEK 2019 pualin hun hman a ni.

He hun hi Lunglei Additional DC Pu David Liansanglura Pachuau in kaihruaiin kalkhawmte lawmna thu a sawi a. Vigilance Awareness Wekk in a tum ber chu hlemhletna leh eirukna lak a kan fihlim theihna tura hmalak tharna a nih thu sawiin kalkhawmte chu dikna um a, thil dik lo leh sual laka fihlim theuh tum turin a sawm a. He awareness in a tum chu thil tisual tute chhuia an phu tawk hrem chauh a ni lo a, a tir atanga thil fello leh dik lo laka mitin kan lo fimkhur theih nan nun zirtir a tum bawk a ni, a ti.

Pu B. Lalnghakliana, Dy SP, ACB Vigilance Department chuan Vigilance Awareness chungchang kalkhawmte zirtirin thutiam sawihona hun hman a ni bawk a. Pu Lalchhuanthanga, Additional SP, Lungleiin lawmthu sawina hun a hmang a ni.

Vigilance Awareness Week hi sawrkar laipuia Central Vigilance Commission thu angin kum tin Sardar Vallabhbhai Patel-a piancham (October ni 31) chhung khungin hman thin a ni a. Hlemhletna leh ei rukna tibo tur leh a laka inthiar fihlim tura inzirtir tharna leh intiam tharna atan hman thin a ni. Kumin hian October ni 28 atanga November ni 2 thleng he chawlhkar hi hman tur niin, thupuiah 'Integrity - A Way of Life (Rinawmna - Nunphunga Neih)' tih chu hman a ni.