Pu Lalrinliana Sailo, Speaker, Mizoram Legislative Assembly chuan nimin chawhnu khan Lunglei rawn thlengin Lunglei HPC Vice Chairman Pu Lawmawma Tochhawng, DC Pi K. Lalrinzuali, SP Pu C.Lalthanmawia leh Lunglei District Head of Office leh party hruaituten anlo hmuak.

Circuit House, Lungleiah amah lo hmuaktu te nen inkawmhona tawi an neih hnuah Speaker hian Lunglei High Powered Committee (HPC) Office, Chanmari tlawhin HPC member-te leh official-te nen hmasawnna hnathawh hrang hrang leh hmachhawpte an sawiho.

He hunah hian Pu Lalrinliana Sailo chuan thu sawiin Lunglei district hmasawnna tura nasa taka thawktu High Powered Committee (HPC) member-te leh official-te nen inkawmhona hun tha tak an nei thei chu lawmawm a tih thu a sawi a. Chhimlam hi Mizoram kawtchhuah pawimawh tak pakhat a nih thu leh, ram pawn atanga buangrua lo luhna tur kawngkapui a nih dawn avangin a la pawimawh zual zel dawn a ni, a ti a. Border trade lama hmalakna tur ngaihven hian amah ngei pawh Myanmar, Bangladesh leh ram dangte tlawhin heng ram sawrkar mi pawimawhte vawi engemawzat alo dawr tawh thu leh he border trade ti hlawhtling ngei tura hmalak zel anih tur thu a sawi a. High Powered Committee (HPC) member-te leh official-te chu mipui hmakhua ngaia thahnemngai taka theihtawp chhuah zel tur leh kan Economy chawikan dan tur ngaihtuaha rilru seng thin turin a chah bawk a ni.

Pu Lawmawma Tochhawng, HPC Vice Chairman chuan Mizoram Legislative Assembly Speaker-in HPC Lunglei office a rawn tlawh thei chu lawmawm a tih thu sawiin Mizoram chhimlam hmasawnna tura a thahnemngaihna leh ruahmanna tha tak tak a siam pui avangin a chungah lawmthu a sawi a. HPC Lunglei hnuaia hmalakna lo awm tawh thin leh kalpui zel dan tur tlangpui sawiin kuthnathawktute hmalak pui leh an dinhmun chawikan te, mi tuina leh an thiam thil hmanga eizawnna an hmuh theih nana ruahmanna siam pui te, thalai tam zawk mahni kutkawiha eizawnna (entreprenuership) kawnga hmalak pui te kalpui zel a nih tur thu a tarlang a. Tun dinhmunah Lunglei District chu artui leh iskut a intodelh theihnan Department-te leh kuthnathawktute nen hmalak mek a nih thu kalkhawmte a hrilh bawk.

He hunah hian Lunglei DC Pi K.Lalrinzuali leh SP Pu C. Lalthanmawia leh official dangte te bakah Lunglei HPC member-te Pu C. Thanseia, Pu C. Lalchhuana, Pu F. Lalsawmkima, Pu H. Lalthansanga, Pu F. Lalzarmawia leh Pu Robert Hmingthansanga te an tel a ni.

Speaker hi vawiin Lunglei chamin Mizo Academy of Letters (MAL) Jt Headquarters Lunglei buatsaih 'Seminar on Lalzova and F. Rokima kutchhuak' chu Sub Hqrs YMA Conference Hall-ah a hmanpui anga. Naktuk (01/11/2019) hian Aizawl panin Lunglei a chhuahsan ang.