Mizoram Volleyball Association(MVA)buatsaih, CK Hyundai Inter Village Volleyball Tournament, October 22-30 inkara neih chu zanin khan R.Dengthuama hall, Mualpuiah kharna neih a ni a. Mizoram State Assembly Dy.Speaker Er.Lalrinawma chu Khuallian a ni.

Infiammi thalai rual kal khawmte hmaah thu sawiin Pu Rinawma chuan MVA in hetianga inelna ropui  an buatsaih chu lawmawm a tih thu a tarlang a. Hei hian thalaite zingah hmasawnna nasa tak a thlen ngei a beisei tih a sawi. Ramin hma a sawn ang zelin infiamna lamah pawh hmasawnna a awm zel a ni tih sawiin Pu Rinawma chuan infiamna hmunhma changtlung nei turin ramin hma a sawn a pawimawh a ti a. Thalai te chu mahni kawng zawh theuhvah a ber nih tum zel tura fuihin an thil tihna kawng tinreng ah rintlak tur te,  mahni hnam ngaihsan nachang hre tur leh an hmalakna apiang phur taka tih tum zel turin a chah a ni.

CK Hyundai Inter Village Volleyball Tournament ah hian khua/veng hrang hrang atangin mipa team 52 leh hmeichhe team 18 an chhuak a ni.