Vawiin khan State Designated Agency (SDA) Energy Conservation, P&E Department  bultumin Champhai District huamchhunga Power & Electricity Department hnuaia thawkte tan I&PR Auditorium-ah ‘Seminar on Energy Conservation and Electrical Safety’ tih buatsaih a ni.

He hunah hian Pu Lalzorama, SE Champhai Power Circle chuan Electrical Directorate hmalakna a Power renchem leh tihpalh laka inven dan tha zawk zirna hun siam ani chu lawmawm tiin he hun hmang tura lokalte chungah lawmthu a sawi a. P&E hnathawkte chu nitin nuna pawimawh zirtira hrilhfiah a awm turte ngun taka ngaithlaa vawnnung tlat tum turin a chah nghal a ni.

Chief Electrical Inspector Pu H.Zonunsanga chuan ‘Electrical Safety & Accident’ tih thupui hmangin zirtirna a pe a.  P&E  Department  chuan a vawi khatna turin Safety Manual a  duan zawh tawh thu leh   pawm hun chauh nghah anih thu a sawi a.  P&E thawktute chu himna ngaipawimawh hmasa fo tur leh harhfim taka hnathawk thin turin a chah a. Safety equipment-te anih dan ang zelin a tul hunah hman a ngaih thu leh vanduaina thleng thulhah thuneitute hrilhhriat vat a finthlak thu a sawi a. Electricity Act hrang hrangte sawizauin a hrilhfiah nghal bawk a ni.

He hunah hian Pu Vansangliana, Project Co-ordinator, SDA for Energy Conservation chuan India chu khawvela Energy hmang tam ber 3 na a nih thu leh mipui pung zel vangin power mamawhna  a sang  zel dawna, khamkhawp thar theih loh hun a thlen hun hmaa lo invenlawk chu tihmakmawh a ni, a ti a. Kawlphetha  Mega Watt 1 siam turin cheng Vaibelchhe 4-5 angai a, renchem leh dik zawka hman chuan indaih theih a ni a, India ramah siam belh ngai loin inrenchemna vangin Mega Watt 25000 vel zet a khawl theih ani, a ti a.  Energy Conservation Act 2001, October 1 March 2002 a hman tan hmangin Bureau of Energy Efficiency (BEE) chu energy renchem dan tur duangtu leh kalpui tura ruat niin,  hemi hnuaiah hian State Designated Agency (SDA) for Energy Conservation pawh Mizoramah  February Ni 12, 2008 ah  din a ni, a ti. Mizoram chhungah awmze neia kawlphetha kan renchem theihna turin hma an la a, mipuite hnenah pawh zirtirna an pe thin tih a sawi a. India rama energy Installed capacity chu 360.788 GW anih thu leh Energy hmuhna tam ber 74.4 % chu Lungalhthei niin tuna atanga kum 200 velah chuan hengte pawh hi zo tura chhut ani, a ti bawk. Mizoram Electric dinhmun tarlangin, chawhrualiin nitin   MW 100 mamawh ani tiin,  Installed capacity 29.85 MW atanga a taka dehchhuah chu  10 MW chauh a ni, a ti a.   Indaihlohna State pawn atanga chawluh  chu MW 80 a nih thu leh a lei nan thlatin cheng vaibelchhe   25 chuang sen thin a ni a ti bawk.  NPC Survey tarlan dani Kawlphetha hmanna tam ber chu enga chhit niin, 69% a awh avangin eng chhit leh inchhung electric bungruate renchem taka hman a ngaih thu a sawi a. Electrical wiring vuah turin load mil zela wire thlana, Licensed contractor te chauh vuah tir a him thu a sawi bawk.

Vawiin  Seminar hi Pu Laldawngliana, Electrical Inspector chuan a kaihruai a.  Pu J.Lalhmachhuana, EE Champhai Power Division-in thu  sawi bawk a. Hemi hnu hian Pu Lalsangzuala Sailo, JE, Electrical Inspectorate in lawmthu sawina hun hmangin Seminar hi a khar a ni. Nimin lamah Champhai District Hospital tan Seminar hi neih niin, vawiin chawhma lamah khan Champhai khawpui chhunga Sikul thlanbik 30 atanga Zirtirtute pualin Seminar neih a ni a, Sikul hrang hrangte hi Current hehlo LED Bulb 9 Watt  6 theuh,  LED Tube  4 theuh leh  Ceiling fan 3 theuhte  pek an ni.

Vawiin Seminar-ah hian Champhai District huamchhunga P&E Staff 130 chuang an tel thei a ni.

Attachment

  • Loading attachment...